કવર સ્ટોરી

૨૦૩૬માં ભારતમાં ઓલિમ્પિકના આયોજનની દાવેદારી સ્વીકૃત થશે?

- તરુણ દત્તાણી

એશિયન ગેમ્સ અને કોમનવેલ્થ ગેમ્સ જેવા આંતરરાષ્ટ્રીય રમતોત્સવનું આયોજન કરી ચૂકેલ ભારત હવે ૨૦૩૬માં ઑલિમ્પિક રમતોત્સવનું યજમાન બનવા ઇચ્છે છે. પેરિસમાં જુલાઈના ચોથા સપ્તાહમાં શરૂ થઈ રહેલા ઑલિમ્પિક રમતોત્સવ દરમિયાન ૨૦૩૬ના ઑલિમ્પિકનો નિર્ણય થવાનો છે અને તેને માટે ભારત પણ પોતાની દાવેદારી રજૂ કરશે. ભારતમાં તેને માટે છેલ્લા કેટલાક સમયથી ઇન્ડિયન સ્પોર્ટ્સ ઑથોરિટી અંતર્ગત રચાયેલ મિશન ઑલિમ્પિક કમિટી (એમ. ઓ.સી.) તૈયારીમાં વ્યસ્ત હતી. હવે એ સમય આવી ગયો છે અને ભારતીય મિશન પેરિસ ઑલિમ્પિકમાં દાવેદારી માટે જોરશોરથી લોબિંગ કરશે. એમ.ઓ.સી.એ ઑલિમ્પિકના આયોજનનો દાવો કરવા માટેનો વિસ્તૃત રિપોર્ટ કેન્દ્રીય ખેલ મંત્રી મનસુખ માંડવિયાને સુપરત કરી દીધો છે. ૨૦૩૬માં ભારતના આંગણે ઑલિમ્પિકનું આયોજન કરવું હોય તો તેને માટે આંતરરાષ્ટ્રીય ઑલિમ્પિક સમિતિ (આઇ.ઓ.એ.)ને પ્રભાવિત કરવી પડશે. મિશન ઑલિમ્પિકના એક સભ્યના જણાવવા પ્રમાણે પેરિસ ઑલિમ્પિક દરમિયાન આઇ. ઓ.સી. સમક્ષ લોબિંગ કરવું પડશે અને અમે સમગ્ર પ્લાન સાથે તેને માટે તૈયાર છીએ.