વેલી ઓફ ફ્લાવર્સ, ધરતીનું રંગીન સ્મિત

ઉત્તરાખંડ રાજ્યનું ફૂલ ગણાતું શિવજીને પ્રિય બ્રહ્મકમલ જેમ પિંડારી, રૂપકુંડ, હેમકુંડ અને કેદારનાથમાં જોવા મળે છે, તેમ અહીં પણ ઑગસ્ટ સપ્ટેમ્બરમાં જોવા મળે છે

- રક્ષા ભટ્ટ

આપણે અનેક વખત રંગીન પતંગિયાઓને રંગબેરંગી ફૂલો પર ઊડતાં જોયા છે અને અનેક વખત એવા લોકોને પણ જોયા છે જેને ફૂલો માટે, ફૂલોના દેખાવ અને સુગંધ માટે અનહદ લગાવ, આદર અને પ્રેમ હોય. આવા પુષ્પપ્રેમી લોકોને એન્થ્રોફાઇલ કહેવાય છે. આવી એન્થ્રોફાઇલ વ્યક્તિઓ ફૂલોના વાયબ્રન્ટ રંગો, તેની મીઠી સુગંધો, તેની સુંદરતા અને તેના બોટોનિકલ જગતમાં એટલા ડૂબેલા રહે છે કે આવી વ્યક્તિઓના ઘરનાં આંગણાં હોય કે દીવાનખંડ હોય, ઑફિસનો કોઈ ગમતો ખૂણો હોય કે પ્રિયજનનો જન્મદિવસ હોય તેઓ તેને રંગીન ફૂલોથી અને તેની સુગંધથી તરબતર કરીને જ જંપે છે.

આવા ફ્લાવર લવર્સ માટે ખુદ ઈશ્વરે આપણા ઉત્તરાખંડના ચમૌલીમાં વેલી ઑફ ફ્લાવર્સ નામની એક આખી ૮૯ ચોરસ કિલોમીટરની ઘાટી ડિઝાઇન કરી છે, જે જુલાઈથી સપ્ટેમ્બરમાં રંગીન પર્વતીય ફૂલોથી સભર ભરેલી હોય છે.

ફૂલોની આ ઘાટી ભારતની બોટોનિકલ વન્ડરલૅન્ડ હોવા ઉપરાંત વેલી ઑફ ફ્લાવર્સ નેશનલ પાર્ક પણ છે, જે યુનેસ્કો વર્લ્ડ હેરિટેજ સાઇટનો તાજ પહેરીને વિશ્વ પ્રવાસીઓને આકર્ષે છે.

પશ્ચિમ હિમાલયના ગઢવાલ પ્રદેશની પુષ્પાવતી રિવર વેલીમાં સ્થિત આ ફૂલોની ઘાટી ૧૦,૯૯૭ ફૂટથી ૧૨,૦૦૧ ફૂટની ઊંચાઈ પર આવેલી છે. દક્ષિણે બદ્રીનાથ, ઉત્તરે માના, પૂર્વે હેમકુંડ સાહીબ અને નંદાદેવી રાષ્ટ્રીય ઉદ્યાન અને પશ્ચિમે કેદારનાથ બાબાની હૂંફમાં રહેલી આ ફૂલોની ઘાટી આઠ કિલોમીટર લાંબી અને બે કિલોમીટર પહોળી છે. ૧૯૩૧ સુધી છુપાયેલી રહેલી આ અંતરિયાળ વેલીમાં ૧૯૩૧માં ૨૫,૪૪૬ ફૂટ ઊંચા માઉન્ટ કામેતનું સફળ એક્સ્પિડિશન પૂર્ણ કરી પાછા ફરી રહેલા ત્રણ બ્રિટિશ પર્વતારોહકો રસ્તો ભૂલ્યા અને અચાનક અહીં આવી ચડ્યા, જ્યાં આસપાસ સર્વત્ર ફૂલો જ ફૂલો હતાં. ફૂલોથી સભર દૃશ્ય ફલકનો દિલધડક નજારો જોઈને ફ્રેન્ક સ્મિથ, હોલ્ડવર્થ અને એરિક શિપ્ટને આલ્પાઇન ફૂલોથી ભરચક આ ઘાટીને વેલી ઑફ ફ્લાવર્સ એવું નામ આપ્યું, જ્યાં હવે તો વર્ષે દહાડે વીસેક હજાર પ્રવાસીઓ પહોંચે છે.