તિરુપતિ પ્રસાદના ઘીનાં ટેન્કર જીપીએસ સિસ્ટમથી સજ્જ

નંદિનીનું વડું મથક જીપીએસ સિસ્ટમ મારફત ટૅન્કરો પર નજર રાખશે. ટૅન્કરો પર ગોઠવવામાં આવેલ ઇલેક્ટ્રોનિક લૉકને માત્ર વડામથક દ્વારા મોકલવામાં આવેલ ઓટીપી દ્વારા જ ખોલી શકાશે

- ચાણક્ય

પ્રસિદ્ધ તીર્થધામ તિરુપતિ બાલાજી મંદિરના પ્રસાદના લાડુના ઘીમાં પ્રાણીની ચરબીના અહેવાલથી સર્જાયેલા વિવાદ બાદ ઉપયોગમાં લેવાતાં ઘીની ગુણવત્તાની તપાસને અંતે આખરે ઘીની સપ્લાય માટે અગાઉની એજન્સીને ફરી કામ સોંપાયું છે.

સસ્તા ભાવે ઘી મેળવવાની લાલચમાં નબળી ગુણવત્તાવાળા ઘીનો પુરવઠો અપાતો હતો. ઘીની સપ્લાય માટે એજન્સી બદલાઈ ત્યારે અગાઉની નંદિની બ્રાન્ડ ઘીના સપ્લાયરોએ કહ્યું જ હતું કે, તેઓ જે ભાવે મંદિર સંસ્થાને ઘી આપે છે તેના કરતાં ઓછા ભાવે ઘી મળે તો તેનો મતલબ એ થશે કે ઘીની ગુણવત્તામાં બાંધછોડ થશે. બબ્બે લેબોરટરીની તપાસના રિપોર્ટ બાદ આખરે નંદિની બ્રાન્ડ ઘી લેવાનું શરૂ કરાયું છે. તિરુપતિ બાલાજીના ભક્તો ઉપરાંત તિરુપતિ દેવસ્થાન ટ્રસ્ટ અને પૂજારીઓ સહિત સૌ વ્યથિત થયા હતા. દેશવિદેશમાં ફેલાયેલા શ્રદ્ધાળુઓની લાગણીને ઠેસ પહોંચી.