અંધશ્રદ્ધા સામે વર્ષોથી ચાલતી નાનકડી લડાઈ

અંજારનાં શિક્ષિકા ૩૫ વર્ષથી કાળીચૌદસે કિશોરવયના વિદ્યાર્થીઓ સાથે ‘મેલી' મનાતી જગ્યાઓ, સ્મશાનોમાં જઈને અંધશ્રદ્ધા દૂર કરવાનો પ્રયોગ કરે છે.

- સુચિતા બોઘાણી કનર

શ્રદ્ધા અને અંધશ્રદ્ધા વચ્ચે બહુ પાતળી ભેદરેખા છે. જો લોકોમાં ભગવાન પ્રત્યે શ્રદ્ધા હોય તો તેઓ ચોક્કસ માની શકે કે જ્યાં ભગવાન હોય ત્યાં ભૂત હોઈ ન શકે, પરંતુ આ માટે લોકોના મનમાંથી ભૂત, વળગાડ, મેલી વિદ્યાનો ભય દૂર કરવો જરૂરી છે. કચ્છના અંજાર શહેરનાં એક શિક્ષિકા છેલ્લાં ૩૫ વર્ષથી આ માટે પ્રયાસો કરે છે.

બી.કોમ. બી.એડ. ભણેલાં નયનાબહેન ભટ્ટ નામનાં ૬૬ વર્ષીય મહિલા અંધશ્રદ્ધા સામેની આ લડાઈ નિઃસ્વાર્થભાવે લડી રહ્યાં છે. તેઓ વિદ્યાર્થીઓને ટ્યુશન આપે છે. જો મનમાં ભગવાન પ્રત્યેની શ્રદ્ધા, પ્રામાણિકતા, ઈમાનદારી, પરિશ્રમની ભાવના હોય તો કોઈ ગ્રહ કે ભૂત નડતું નથી, એવું તેઓ માને છે. તેઓ જણાવે છે કે, ‘હું નાની હતી ત્યારે મારા કાકાના દીકરા સમજાવતા કે ભૂતપ્રેત જેવું કશું હોતું નથી. તેમની વાત મારા મનમાં સજ્જડ બેસી ગઈ હતી, પરંતુ મારાં મોટાં બહેન અંધશ્રદ્ધામાં માનતાં હતાં. તેઓ જ્યારે નવા ઘરમાં રહેવા ગયાં ત્યારે તેમના મનમાં તે જગ્યાએ ભૂત થતું હોવાની વાત ઠસી ગઈ હતી. તેઓ ડરના કારણે ગુજરી ગયાં. ત્યારે જ મેં અંધશ્રદ્ધાને દૂર કરવાનો પ્રયત્ન કરવાનો સંકલ્પ કર્યો હતો.’