શ્રદ્ધાંજલિ

જીવાતી જિંદગીના ઝબકાર ઝીલનારની વિદાય

- સ્પર્શ હાર્દિક

૧૯૮૦માં જૂનાગઢથી જેતપુરના રસ્તે, શિયાળાની રાત્રે આવરોજાવરો ન હોય ત્યારે સ્કૂટર થંભાવી, આકાશમાં નજર કરી થોડા દિવસ અગાઉ જ મૃત્યુ પામેલી માતાને મોટેથી સાદ પાડતા પુરુષને કલ્પી જુઓ . સાબરકાંઠાના વનપ્રદેશમાં, પત્ની અને બે-એક વર્ષની દીકરી સાથે દસેક દિવસ સુધી, પગે છાલાં પડી જાય એટલું ફરીફરીને એક અનોખી કથા શોધવા નીકળેલા સર્જકને કલ્પી જુઓ; અથવા તો ૧૯૧૬૨૧ દરમિયાન પ્રકાશિત થયેલા ‘વીસમી સદી’ સામયિકના ડિજિટલાઇઝેશનનો નવીન પ્રકલ્પ હાથ ધરનાર માણસને કલ્પી જુઓ. આ તમામ કલ્પનાઓમાં જેમનો ચહેરો દેખાશે એ રજનીકુમાર પંડ્યાએ ૨૦૨૫ની ૧૫ માર્ચે અંતિમ ઉચ્છવાસ છોડી ૮૬ વર્ષની વયે સંસારમાંથી વિદાય લીધી. પ્રભુ એમના આત્માને શાંતિ અને સદ્ગતિ અર્પે એવી અભ્યર્થના.

૬ જુલાઈ, ૧૯૩૮ના રોજ જેતપુરમાં તેમનો જન્મ થયેલો. માતા-પિતા બંને શિક્ષિત અને વાંચનસિક હોવાથી સાહિત્યસંસ્કાર તેમને વારસામાં મળ્યા. મેટ્રિક પછીનો અભ્યાસ કર્યો વાણિજ્ય શાખામાં, એથી જીવનભર રંજ રહ્યો કે ભાષા-સાહિત્યનું ક્ષેત્ર પસંદ કરીને અધ્યાપક બન્યા હોત તો પોતે ગુજરાતી સાહિત્ય જગતમાં જેટલા સન્માનના હકદાર હતા એ તેમને મળ્યું હોત. ખેતીવિકાસ બૅન્કની, સરકારી ઑડિટરની અને પછી બૅન્ક મેનેજરની નોકરી તેમણે કરી. અંતે ૫૧ વર્ષની વયે નોકરી ત્યાગીને સંપૂર્ણ કલમનિર્ભર થઈ ગયા.