ગ્રંથસંગ્રહ, સંશોધન અને સુરક્ષાનો ત્રિવેણી સંગમ

સુરતની જૈન સંસ્થાની અનોખી ગ્રંથપ્રીતિના પરિણામ સ્વરૂપ આકાર લેનારું ‘અધ્યાત્મ જ્ઞાનતીર્થ’ જ્ઞાનપિપાસુઓ માટે આશીર્વાદરૂપ બનશે.

- અરવિંદ ગોંડલિયા (સુરત)

જૈનાચાર્ય યોગતિલકસૂરીશ્વરજી જીવસૃષ્ટિનાં કલ્યાણ માટે જરૂરી છે ગ્રંથોનું સંશોધન, પ્રકાશન અને પઠન.

એક લાઈબ્રેરીમાં શું હોઈ શકે? અથવા શું હોવું જોઈએ? વિવિધ ભાષા અને વિષયનાં અઢળક પુસ્તકો, એ સરળતાથી જોઈ અને મેળવી શકાય એવી વ્યવસ્થા તથા વાચકો અને અભ્યાસુઓ માટે સારી બેઠકવ્યવસ્થા. હા, શાંતિપૂર્ણ વાતાવરણ તો ખરું જ. પ્રાચીન અને અલભ્ય પુસ્તકો ધરાવતી આવી ઘણી લાઈબ્રેરી જોવાલાયક હોય છે.

ગુજરાતમાં એવાં કેટલાંક જાણીતાં પુસ્તકાલયો-ગ્રંથાલયો છે, એમાં સુરતની એક જૈન લાઈબ્રેરી પણ ખરી. આ જૈન પુસ્તકાલય અર્થાત્ જ્ઞાનભંડાર કે શાસ્ત્રસંગ્રહ તો ખરેખર દર્શનીય છે.

સુરતના જૈન સંસ્થાન શ્રી શાંતિ કનક શ્રમણોપાસક ટ્રસ્ટ-અધ્યાત્મ પરિવાર સંચાલિત અધ્યાત્મ જ્ઞાનતીર્થ નામનો જ્ઞાનભંડાર હમણાં ખુલ્લો મૂકવામાં આવ્યો છે.

આવો જાણીએ, આ જૈન જ્ઞાનભંડારની વિશેષતા.

સુરતના નાનપુરા વિસ્તારમાં આવેલા જૈન ધર્મનાં સાત ક્ષેત્રની ભક્તિ સુરક્ષા માટે કટિબદ્ધ એવા અધ્યાત્મ પરિવાર દ્વારા શ્રી હરિભદ્રસૂરિ શાસ્ત્રસંગ્રહ છ વર્ષથી કાર્યરત હતું. હવે એ કૉર્પોરેટ લુકની ચાર મજલાની લાઈબ્રેરી બન્યું છે. એમાં વિશેષતઃ જૈન સાહિત્ય છે. એ ઉપરાંત, ૭૦ હજાર જેટલાં જીવનમૂલક પુસ્તકો છે. ગ્રંથાલયનું અદ્યતન ઢબે વિસ્તરણ કરીને એનું નવતર નામકરણ કરવામાં આવ્યું: અધ્યાત્મ જ્ઞાનતીર્થ. એની પ્રવૃત્તિ કહો કે ઉદ્દેશ છેઃ ગ્રંથસંગ્રહ, ગ્રંથસંશોધન, નવસર્જન અને ગ્રંથસુરક્ષા.

નિઃશુલ્ક ચાલતું જ્ઞાનતીર્થ દેશભરના દાતાઓના સહયોગ તથા શ્રી શાંતિ કનક શ્રમણોપાસક ટ્રસ્ટ-અધ્યાત્મ પરિવારના ટ્રસ્ટીઓ અને સેવાભાવી કાર્યકરોના લીધે સાકાર થયું છે.

એક તરફ દુર્લભ ગ્રંથો અને હસ્તપ્રતોને હાઈ રેન્જ સિસ્ટમથી સ્કેન કરી એની સાચવણીનું કામ ચાલે છે તો લાઈબ્રેરીનાં હજારો પુસ્તકો આવનારા વર્ષોમાં લોકોની જ્ઞાનવૃત્તિ સંતોષશે.