ક્યું કી દિલ હૈ હિંદુસ્તાની...

તેર વર્ષની ઉંમરે પાકિસ્તાનથી ભારત આવી વસેલી આ સ્ત્રીને આજે ૩૪ વર્ષે પણ ક્યારેક ‘પાકિસ્તાની’નું લેબલ લગાડી દેવામાં આવે છે. કહાની એ મહિલાની, જેણે ભારતની નાગરિકતા મેળવવા વર્ષો સુધી તપસ્યા કરવી પડી. હવે આ સ્ત્રી પોતાના જેવા જ શરણાર્થીઓને ભારતની નાગરિકતા અપાવવા માટે અમદાવાદમાં ‘હેલ્સિંગ હૅન્ડ્સ’ નામની સંસ્થા ચલાવી રહી છે. પાકિસ્તાનીથી હિંદુસ્તાની બનવા સુધીની એની કપરી સફર પર એક નજર.

- હેતલ રાવ

૨૬ વર્ષ. હા, પૂરાં ૨૬ વર્ષ એની લડાઈ ચાલી, પોતાને ભારતીય  સાબિત કરવા માટેની કાનૂની લડાઈ. જો કે લોકોનાં છૂટાંછવાયાં મહેણાં સામેની એની લડાઈ આજેય ચાલી રહી છે. એ મહેણું છે એક પાકિસ્તાની તરીકેનું.

અલબત્ત, એનાથી વિચલિત થયા વગર ડિમ્પલ વરિંદાની પોતાનું કામ કર્યે જાય છે. અમદાવાદમાં એ હેલ્સિંગ હન્ડ્સ નામની સંસ્થા ચલાવે છે, જેનું કામ છે પોતાની જેમ પાકિસ્તાન કે અન્ય દેશમાં થતા અત્યાચારથી બચીને નિરાશ્રિત તરીકે ભારત આવેલા લોકોને અહીંની નાગરિકતા અથવા તો લાંબા સમય માટેના વિઝા અપાવવાનું.

મૂળ પાકિસ્તાનના સિંધ પ્રાંતનાં અને છેલ્લાં ૩૪ વર્ષથી અમદાવાદમાં રહેતાં ડિમ્પલબહેનને ભારતીય નાગરિકતા મેળવવા અઢી દાયકા રાહ જોવી પડી. ૨૬ વર્ષના અથાક પરિશ્રમ પછી એ ભારતીય બન્યાં. હવે કોઈને આટલી લાંબી પ્રતીક્ષા ન કરવી પડે એ માટે ડિમ્પલ એમને માર્ગદર્શન પૂરું પાડે છે. એટલું જ નહીં, જ્યાં સુધી એમને નાગરિકતા ન મળે ત્યાં સુધી એમને રાશન કિટ આપવાનું કામ, સરકારી અધિકારીઓ સાથે વાત કરી જરૂરી કાગળ તૈયાર કરાવી એમનાં બાળકોને સરકારી શાળામાં પ્રવેશ પણ અપાવે છે, જેથી બાળકોનો અભ્યાસ ન બગડે. વિસ્થાપિત યુવાનોને સ્કિલ ડેવલપ કરીને નોકરી કે છૂટક કામ અપાવવા નું કામ સંસ્થા દ્વારા કરવામાં આવે છે. આ સંસ્થા પાકિસ્તાનથી આવતી યુવતીઓનું કાઉન્સેલિંગ કરવાનું કામ પણ કરે છે. અત્યાર સુધીમાં હેલ્સિંગ હન્ડ્સ દ્વારા ૧૨૦૦ લોકોને ભારતની નાગરિકતા અપાવવામાં આવી છે તો લગભગ ત્રણ હજાર જેટલા લોકોને લોંગ ટાઈમ વિઝા (એલટીવી) અપાવ્યા છે.

પાકિસ્તાન, બાંગ્લાદેશ અને અફઘાનિસ્તાનથી નિરાશ્રિત તરીકે ભારત આવેલા હિંદુ અને શીખ સહિત છ સમાજના લોકોને ભારતની નાગરિકતા આપવાને લગતા કાયદાનો વિવાદ હમણાં ચાલે છે ત્યારે ચાલો મળીએ, અમદાવાદનાં ડિમ્પલ વરિંદાનીને, જે પ્રિયદર્શિની સમક્ષ મૂકે છે એક હિંદુ તરીકે પાકિસ્તાનમાં એમણે ભોગવેલી પીડાની... અને ભારત આવ્યા પછી એમણે વેઠેલા સંઘર્ષની વાત...

પાકિસ્તાનના સિંધ પ્રાંતમાં ખીપરો સંધાર નામનું ગામ. ત્યાં રહેતાં કમલા અને લાલચંદ નેમાણીનાં ચાર સંતાનમાં ડિમ્પલ સૌથી મોટી. અભ્યાસમાં તેજસ્વી ડિમ્પલને ભણીગણીને સરકારી નોકરી મેળવવાની ઈચ્છા, પરંતુ પાકિસ્તાનની પરિસ્થિતિ ખૂબ ખરાબ. ધોરણ એકથી આઠ સુધી એણે પાકિસ્તાની શાળામાં અભ્યાસ કર્યો.