ક્યારેક જ જોવા મળતી હીટ વેવની સમસ્યા કાયમી કેમ બની રહી છે?

વાતાવરણમાં ઝેર ઓકતાં પ્રદૂષિત તત્ત્વોએ ઋતુચક્ર સાવ જ ખોરવી કાઢ્યું છે. આખી સીઝનમાં થોડા જ દિવસ ઠંડી પડે અને ગણ્યાગાંઠ્યા દિવસોમાં આખા ચોમાસા દરમિયાન વરસતો હોય એટલો વરસાદ એકસાથે ખાબકે એની આપણને હવે નવાઈ નથી. એ સામે ગરમીનું પ્રમાણ સતત વધી રહ્યું છે અને તાપમાન એકદમ ઉપર હોય એ દિવસોની સંખ્યા પણ રેકૉર્ડ તોડી રહી છે.

- નિતુલ ગજ્જર । ઉમંગ વોરા

*અતિશય ગરમીને કારણે પાંચ લોકોનાં મોત.

* અસહ્ય ઉકળાટના પગલે હાર્ટ અટેકના કિસ્સામાં વધારો.

*ગરમી સંબંધિત બીમારીઓને કારણે સરકારી હૉસ્પિટલમાં બેડની અછત.

*ભારતમાં ૩૭ શહેરોનું તાપમાન ૪૫ ડિગ્રી સેલ્સિયસ કરતાં વધારે.

* દિલ્હીમાં ૪૮ ડિગ્રી તો રાજસ્થાનમાં પારો પચાસ ડિગ્રીને પાર...

પાછલા થોડા દિવસથી આ પ્રકારના સમાચારથી ભારતનાં વિવિધ સમાચારપત્રો ઊભરાય છે. દેશના અમુક વિસ્તારોમાં આમ પણ ઉનાળો અતિશય આકરો હોય છે. એમાંય હમણાં હમણાં ગરમી માઝા મૂકી રહી છે. જો કે આ વર્ષના ઉનાળાએ તો અત્યાર સુધીના ઘણા રેકૉર્ડ તોડી નાખ્યા છે.

આ વર્ષે દર વખતની જેમ એપ્રિલ મહિનો બહુ ગરમ નહોતો, જ્યારે મે મહિનામાં ઉનાળાની કાળઝાળ ગરમી માઝા મૂકીને વરસી છે, જેના પરિણામે ભારતનાં ઘણાં રાજ્યોમાં હીટ વેવની પરિસ્થિતિ નિર્માણ થઈ છે અને લોકો હવે તાપથી ત્રાહિમામ્ પોકારી ગયા છે. હીટ વેવ (એટલે કે તીવ્ર ગરમીનું મોજું) જો કે આ વર્ષે જ ઉદ્ભવી હોય એવી સમસ્યા નથી, પાછલાં ઘણાં વર્ષોથી આપણે ત્યાં હીટ વેવના સમાચાર સાંભળવા મળે છે. અગાઉ આ કુદરતી આફતનો સામનો ક્યારેક જ કરવો પડતો, જેની સામે હવે તો હીટ વેવની પારાયણ જાણે કાયમી બની રહી છે.

દુનિયાના ઘણા પ્રાંતમાં ઉનાળા દરમિયાન હીટ વેવની સમસ્યા સર્જાય છે, પણ એ થોડા દિવસોમાં ટળી જતી હોય છે, જ્યારે ભારતમાં આ વર્ષે લગભગ ૧૫ દિવસ સુધી હીટ વેવનો માહોલ જોવા મળ્યો છે.