પપ્પા, તમે તો કાંઈ બોલતા જ નહીં...

પુત્ર તાડૂકીને બોલ્યો, ‘ચૂપ રહો, પપ્પા તમે’ તે દિવસથી બાપનાં પારોઠ પગલાં થઈ ગયાં જીવ માફક જાળવીને જેમનું કીધું જતન એ જ વ્હાલાની નજરમાં સાવ દવલાં થઈ ગયા.

- હિતેન આનંદપરા

૫તિ અને પત્ની સિક્કાની બે બાજુ હોય છે. એમના થકી જે નવો સિક્કો જન્મે એનું અસ્તિત્વ અલગ હોવાનું. વાત્સલ્યનો વારસો અને વ્યવહારુ વિચારસરણી વચ્ચેનો ભેદ પેઢીઓથી કનડતો આવ્યો છે. ઘણી વાર તિરાડ ક્યારે ખાઈ બની જાય એની ખબર રહેતી નથી.

આધુનિક જીવનશૈલી નિરાંતનો માહોલ ઝૂંટવી રહી છે. ડાઈનિંગ ટેબલ પર સાથે બેસીને જમવાનો સમય તિતરબિતર થઈ ગયો છે. જે ઘરમાં સાથે બેઠક ન હોય ત્યાં સંજોગો ઊઠકબેઠક કરાવવા સદૈવ તત્પર જ હોય. ઘર પરિવારથી સભર બને છે. માંદગી વખતે એ હકીકત સમજાય કે સંપર્કો ગમે એટલા વ્યાપક હોય, અંતે તો લોહીનો સંબંધ જ પડખે ઊભો રહેવાનો. આ સંબંધ આધુનિક જીવનશૈલીમાં કસોટીએ ચડી રહ્યો છે.