તમને આ સારા સમાચારની ખબર 5ઈ રીતે પડી શકે?

હોર્મોનલ ફેરફારથી માંડી અમુક ચીજો ખાવાની તલપ સુધી ગર્ભાધાનના આ છે સંકેત.

- ડૉ. અર્ચના પારસ શાહ

એક જમાનો હતો જ્યારે નિઃસંતાન સ્ત્રીને અપૂર્ણ માનવામાં આવતી હતી. હવે સાવ એવું તો રહ્યું નથી, પરંતુ માતૃત્વ આજે પણ સ્ત્રીના જીવનનો એક મહત્ત્વનો તબક્કો તો ગણાય જ છે. ચાલો, તો આજે આ તબક્કાના પ્રારંભ એટલે કે ગર્ભાધાનનાં લક્ષણો વિશે વાત કરીએ.

સ્ત્રીઓમાં ગર્ભાધાનને લઈને વિવિધ માન્યતા પ્રવર્તતી હોય છે. મોટા ભાગની સ્ત્રીઓને ફલિત થયેલા અંડકોષ જ્યાં સુધી ગર્ભાશયની દીવાલને ન જોડાય ત્યાં સુધી એટલે કે ગર્ભાધાનના થોડાક દિવસો સુધી પોતે ગર્ભવતી થઈ છે એનો ખયાલ આવતો નથી, જ્યારે ઘણી મહિલાના કિસ્સામાં એવું બને છે કે જ્યાં સુધી એમને માસિક આવવાનું બંધ ન થાય ત્યાં સુધી એમને આ વિશે કોઈ પણ અણસાર આવતો નથી. અહીં કેટલીક એવી નિશાનીઓ અપાઈ છે જે તમને ગર્ભધારણ થયાના સંકેત દર્શાવે છે. તમે અહીં જણાવેલી બધી અથવા તો એમાંની કેટલીક બાબતો અનુભવી શકો છો. એવું પણ બને કે આમાંની એક પણ બાબત તમને લાગુ ન પડે.

*ખોરાકની તલપઃ ખોરાકની વારેઘડીએ તલપ લાગવી એ એક પરંપરાગત નિશાની મનાય છે. જો કે માત્ર વારેઘડીએ ખાવાની ઈચ્છા થવાથી તમે ગર્ભવતી થયાં છો એમ માની લેવાની જરૂર નથી.