ലോകരാഷ്ട്രീയത്തിൽ വനിതാ തിളക്കം

ഇന്ന് ലോകത്തെ പല രാജ്യങ്ങളിലും ഭരണം കൈയാളുന്നത് വനിതകളാണ്. ലോകമൊട്ടാകെ രാഷ്ട്രീയരംഗത്ത് വനിതകളുടെ മുന്നേറ്റം പ്രകടമാണ്

- - അരുഷ്ണ  ജെ.എസ്.

യു. എസ്. ന്യൂസ് ആൻഡ് വേൾഡ് റിപ്പോർട്ട് എന്ന അമേരിക്കൻ മാധ്യമസ്ഥാപനം 2022-ൽ നടത്തിയ സർവേയിൽ സ്ത്രീകൾ ഭരിക്കുന്ന രാജ്യങ്ങൾ കൂടുതൽ കാര്യക്ഷമമാണെന്ന് 70 ശതമാനം പേരും അംഗീകരിക്കുന്നതായി പറയുന്നു. ഈ സർവേ ഫലത്തെ ശരിവെയ്ക്കുന്ന ഒന്നാണ് കോവിഡ് മഹാമാരിക്കാലത്ത് ന്യൂസീലൻഡിൽ പ്രധാനമന്ത്രി ജസീന്താ ആഡേനിന്റെ നേതൃ ത്വത്തിൽ നടന്ന പ്രതിരോധപ്രവർത്തനങ്ങൾ. 37-ാം വയസ്സിൽ പ്രധാനമന്ത്രിസ്ഥാനത്തേക്ക് തിരഞ്ഞെടുക്കപ്പെട്ട ജസീന്താ ലോക ശ്രദ്ധ നേടിയത് തന്റെ കഴിവുറ്റ പ്രവർത്തനങ്ങളിലൂടെയായിരുന്നു. വൈറസിനെതിരേയുള്ള ശക്തമായ പ്രതിരോധത്തിലുടെയും തോക്ക് ഉപയോഗിക്കുന്നതിലടക്കം കർശനനിയമങ്ങൾ നടപ്പിലാക്കിയും ന്യൂസീലൻഡിനെ ലോകശ്രദ്ധയിലേക്ക് നയിക്കാൻ അവർക്കായി. മലയാളി വനിത പ്രിയങ്ക രാധാകൃഷ്ണനും ജസീന്തായുടെ മന്ത്രിസഭാംഗമായി പ്രവർത്തിക്കുന്നുണ്ട്.

ജസീന്തയെയും പ്രിയങ്കയെയും പോലെ ലോകരാഷ്ട്രീയത്തിന്റെ ഗതി നിർണയിക്കുന്നതിൽ വനിതാനേതാക്കളുടെ പങ്ക് കൂടി വരികയാണ്. പല രാജ്യങ്ങളിലും ഭരണത്തലപ്പത്ത് ഇന്ന് സ്ത്രീകളാണ്. ഇരുപതിലേറെ രാജ്യങ്ങളിൽ വനിതകളാണ് അധികാരം കൈയാളുന്നത്.

2022 ജൂലായ് 25-ന് രാഷ്ട്ര പതിയായി അധികാരമേറ്റ ദ്രൗപദി മുർമു വനിതാനേതാക്കളുടെ പട്ടികയിലെ ഇന്ത്യൻ സാന്നിധ്യമാണ്. ഗോത്രസമുദായത്തിൽനിന്നുള്ള ആദ്യരാഷ്ട്രപതിയാണ് മുർമു.

കരുത്തുറ്റ യൂറോപ്യൻ രാജ്യങ്ങളിലൊന്നായ ഇറ്റലിയിൽ ജോർജിയ മെലോണി 2022 ഒക്ടോബർ 22-നാണ് പ്രധാനമന്ത്രിയായി സ്ഥാനമേറ്റത്. ഇറ്റലിയിൽ ഈ പദവിയിലെത്തുന്ന ആദ്യവനിതയാണിവർ. വലിയ എതിർപ്പുകളെ അതിജീവിച്ചാണ് കടുത്ത വലതുപക്ഷക്കാരിയായ ജോർജിയ മെലോണി തിരഞ്ഞടുക്കപ്പെട്ടത്.