കേന്ദ്ര സർവീസിൽ എം.ടി.എസ്, ഹവിൽദാർ ഇത്തവണ ഒറ്റഘട്ട പരീക്ഷ മാത്രം

കംപ്യൂട്ടർ അധിഷ്ഠിത പരീക്ഷ മലയാളത്തിലും നടത്തുമെന്ന് എസ്.എസ്.സി.

കേന്ദ്രഗവൺമെന്റിലെ എം.ടി.എസ്., ഹവിൽദാർ തസ്തികകളിലെ നിയമനത്തിനായി സ്റ്റാഫ് സെലക്ഷൻ കമ്മിഷൻ നടത്തുന്ന പരീക്ഷയിൽ സമഗ്ര മാറ്റം. പേപ്പർ-II ഒഴിവാക്കിയാണ് ഇത്തവണ പരീക്ഷ നടത്തുക. പകരം കംപ്യൂട്ടർ അധിഷിതമായ ഒറ്റ പരീക്ഷയാണ് നടത്തുക. പത്താം ക്ലാസ് യോഗ്യതയുള്ളവർക്ക് കേന്ദ്ര സർവീസ് ഉദ്യോഗത്തിന് കൂടുതൽ അവസരം ലഭിക്കുന്ന വിജ്ഞാപനമാണിത്. ഇത്തവണ 12,523 ഒഴിവുകളാണ് വിജ്ഞാപനം ചെയ്തിരിക്കുന്നത്.

കംപ്യൂട്ടർ അധിഷ്ഠിത ഒബ്ജക്ടീവ് പരിക്ഷയിൽ ഇംഗ്ലീഷിനും ഹിന്ദിക്കും പുറമേ മലയാളം ഉൾപ്പെടെയുള്ള 13 പ്രാദേശികഭാഷകളിൽ എഴുതാൻ ഇത്തവണ അനുവാദം നൽകിയിട്ടുണ്ട്. മലയാളത്തിന് പുറമേ അസമീസ്, ബംഗാളി, ഗുജറാത്തി, കന്നഡ, കൊങ്കണി, മണിപ്പുരി, മറാത്തി, ഒഡിയ, പഞ്ചാബി, തമിഴ്, തെലുഗു, ഉറുദു എന്നിവയാണ് അനുവദിക്കപ്പെട്ട പ്രാദേശിക ഭാഷകൾ. ഡിസ്ക്രിപ്റ്റീവായി (വിവരണാത്മകം) നടത്തിയിരുന്ന പേപ്പർ II പരീക്ഷയ്ക്ക് മാത്രമാണ് കഴിഞ്ഞവർഷം വരെ പ്രാദേശികഭാഷകൾ അനുവദിച്ചിരുന്നത്.