ടി.ആർ. കൃഷ്ണസ്വാമി അയ്യർ ഗാന്ധിജി സ്മരിച്ച നേതാവ്

സ്വാതന്ത്ര്യസമരത്തിലും സാമൂഹിക പരിഷ്കരണ രംഗത്തും ഒരു പോലെ പ്രവർത്തിച്ച നേതാവായിരുന്നു ടി.ആർ. കൃഷ്ണസ്വാമി അയ്യർ. മഹാത്മാഗാന്ധി കേരളത്തിൽ മൂന്നുതവണ സന്ദർശിച്ച ഒരേ ഒരു സ്ഥലമായ ശബരി ആശ്രമം സ്ഥാപിച്ചത് കൃഷ്ണ സ്വാമി അയ്യരും ഭാര്യ ഈശ്വരി അമ്മാളും ചേർന്നാണ്

- വി. രാധാകൃഷ്ണൻ

തിരുവിതാംകൂറിലെ ക്ഷേത്ര പ്രവേശന വിളംബരത്തിന്റെ പശ്ചാത്തലത്തിൽ ഗാന്ധിജി തന്റെ അവസാന സന്ദർശനത്തിനായി 1937 ജനുവരിയിൽ തിരുവനന്തപുരത്ത് എത്തി. അവിടെ നടന്ന സമ്മേളനത്തിൽ മഹാത്മജി പറഞ്ഞതിങ്ങനെ. 'കേരളത്തിൽ അയിത്തോച്ചാടന പ്രവർത്തനങ്ങൾക്ക് തുടക്കം കുറിച്ചവരിൽ രണ്ടുപേരുകളാണ് എന്റെ ഓർമയിൽ വരുന്നത്. ടി.ആർ. കൃഷ്ണസ്വാമിയും കേളപ്പനും

സ്വന്തം തൊഴിലും ജീവിതവും സമ്പാദ്യവും എന്തിന് കുടുംബം പോലും സാമൂഹിക നന്മയ്ക്കായി സമർപ്പിച്ച സാമൂഹിക പരിഷ്ക്കർത്താവാണ് ടി.ആർ. കൃഷ്ണസ്വാമി അയ്യർ, മലയാളി മറന്നുപോയ ആ സ്വാതന്ത്ര്യസമരസേനാനിയുടെ ജീവിതം ഇങ്ങനെ:

ഗാന്ധിയൻ രീതിയിൽ അയിത്തോച്ചാടനം, ഹരിജനോദ്ധാരണം തുടങ്ങിയ മേഖലകളിൽ പ്രവർത്തിച്ച ടി.ആർ. കൃഷ്ണസ്വാമി അയ്യർ 1891-ൽ അന്നത്തെ തൃശ്ശൂർ ജില്ലയിലെ പഴയന്നൂരിൽ മഞ്ഞപ്ര ഗ്രാമത്തിൽ ജനിച്ചു. തമിഴ് ബ്രാഹ്മണ കുടുംബമായിരുന്നു. പിതാവ് ടി.കെ. രാമസ്വാ മി അയ്യർ. മാതാവ് അരുന്ധതി. മദ്രാസ് ലോ കോളേജിൽ നിന്ന് നിയമബിരുദം നേടിയശേഷം പാലക്കാട് അഭിഭാഷകവൃത്തി തുടങ്ങി. നിയമപ്രശ്നങ്ങളെക്കാളേറെ നീതി നിഷേധിക്കപ്പെടുന്ന മനുഷ്യരുടെ നിസ്സഹായതയാണ് എന്നും അലട്ടിയിരുന്നത്. 1920-ൽ ഗാന്ധിജിയുടെ നേതൃത്വത്തിൽ നിസ്സഹകരണപ്രസ്ഥാനം ആരംഭിച്ചപ്പോൾ അഭിഭാഷക ജോലി ഉപേക്ഷിച്ച് അതിൽ പങ്കുചേർന്നു.

'നായാടി കൃഷ്ണൻ'