மறைந்தார் பெரியாரின் பேரன்!

திராவிட இயக்கத்தின் முகவரியான, தந்தை பெரியார் குடும்பத்தின் மூத்த உறுப்பினரும், அரசியலில் தனக்கென தனியான ஆளுமைத் திறனுடன் காங்கிரஸ் கட்சியில் பயணித்துவந்தவருமான ஈ.வி.கே.எஸ். இளங்கோவன், சென்னை தனியார் மருத்துவமனையில் உடல்நலக் குறைவு காரணமாக சிகிச்சை பெற்றுவந்த நிலையில்... சிகிச்சை பலனின்றி டிசம்பர் 14-ஆம் தேதி காலை உயிரிழந்தார்.

- ஜீவா தங்கவேல்

தமிழ்நாடு காங்கிரஸ் கட்சியில் ஜி.கே.மூப்பனார், வாழப்பாடி ராமமூர்த்தி போன்ற தலைவர்களுக்கு அடுத்தபடியாக இளங்கோவன் மக்கள் மத்தியில் பரபரப்பாகப் பேசப்படும் தலைவராக விளங்கினார். தன் மனதில்பட்ட கருத்தை வெளிப்படையாகப் பேசக்கூடியவர். தனிப்பட்ட முறையில் சோனியாகாந்தியை, ஜெயலலிதா பெயர் சொல்லி விமர்சித்தபோது, கோமளவல்லி என்று ஜெயலலிதாவுக்கு எதிர்வினையாற்றினார் இளங்கோவன்.

ஒருமுறை மத்திய அமைச்சர், இரண்டு முறை எம்.எல்.ஏ., இருமுறை தமிழ்நாடு காங்கிரஸ் கட்சியின் தலைவர் என இவரது அரசியல் பயணம் நெடியது.

இளங்கோவனுக்கு நீண்டகாலமாகவே நுரையீரல் பிரச்சனை இருந்துவந்தது. அதற்கெனத் தொடர்ந்து சிகிச்சை பெற்றுவந்தாலும், அரசியல் பணி காரணமாக தனது உடல்நலனில் அதிக அக்கறை செலுத்தாமல் இருந்துவந்தார். இந்த நிலையில் தங்கள் குடும்பத்தின் அரசியல் தமிழ்நாட்டில் எப்போதும் தொடரவேண்டும் என்று விரும்பிய இளங்கோவன், தனது மூத்த மகன் திருமகன் ஈவெராவை கட்சிப் பொறுப்புக்குள் கொண்டுவந்து பொதுவாழ்க்கையில் பயணிக்கவைத்தார்.

அதன் தொடர்ச்சியாகத்தான் சென்ற சட்டமன்றத் தேர்தலில் ஈரோடு கிழக்கு தொகுதி தன் மகனுக்கு வேண்டும் என்று தற்போதைய முதல்வர், தி.மு.க. தலைவர் மு.க. ஸ்டாலினிடம் நேரடியாகக் கோரிக்கை வைத்தார். அது தி.மு.க. தொடர் வெற்றிபெற்ற தொகுதி என்றாலும் இளங்கோவனுக்காக சம்மதம் தெரிவித்தார் ஸ்டாலின்.