‘தங்க நகை தொழிற் பூங்கா கோவையில் துவங்க திட்டம் .

தமிழ்நாடு முதல்வர் மு.க.ஸ்டாலின் வரும் 5, 6ம் தேதியில் கோவையில் நடக்கும் விழாக்களில் பங்கேற்கவுள்ளார்.

மாவட்ட கலெக்டர் அலுவலகத்தில் தங்க நகை தொழில் தொடர்பாக தொழில் பூங்கா (‘கிளஸ்டர்’) அமைக்க ஆலோசனை நடக்கவுள்ளது.  இந்தியாவில் தங்க நகை தொழிலில் முதன்மை பகுதியாக கோவை நகரம் இருக்கிறது. தங்க நகை ஏற்றுமதி, தங்க கட்டி இறக்குமதி, தங்க நகைகள் வடிவமைப்பில் கோவை தான் இந்தியாவின் ‘டாப் சிட்டி’யாக இருக்கிறது. பல்வேறு வடமாநிலங்களை சேர்ந்த ஆயிரத்திற்கும் மேற்பட்ட முக்கிய தங்க நகை உற்பத்தியாளர்கள் கோவையில்தான் தொழில் செய்து வருகின்றனர்.

வெளி மாநிலங்களுக்கான ஆர்டர்களிலும் கோவைதான் முக்கிய இடம் பிடித்துள்ளது. ஆட்டோ மொபைல், பம்பு மோட்டார், கிரைண்டர், ஜவுளி தொழிலை காட்டிலும் அதிக வருவாய் கொட்டி தருவது கோவையின் நகை பிசினஸ்தான். நீண்ட காலமாக தங்க நகை தொழில் கட்டமைப்புக்கான திட்டம் தேவை என ஜூவல்லரி சங்கத்தினர் வேண்டுகோள் விடுத்து வருகின்றனர். இந்த தொழிலில் நேரடியாக மறைமுகமாக சுமார் 2 லட்சம் பேர் பணியாற்றுகின்றனர். 50க்கும் மேற்பட்ட பகுதிகளில் தங்க நகை பட்டறைகள் இருக்கின்றன.