மின்சார ரயிலில் சூட்கேஸில் எடுத்து வந்த சடலம் மீட்பு நெல்லூர் பெண் 7 பவுன் நகைக்காக கொலை செய்யப்பட்டது அம்பலம்

துண்டு துண்டாக அறுத்து சூட்கேஸில் அடைப்பு. தமிழ்நாட்டில் வீசிவிட்டு தப்பிச்செல்ல முயற்சி. தந்தை, மகளை கைது செய்து போலீஸ் தீவிர விசாரணை

மீஞ்சூர் ரயில் நிலையத்தில் சூட்கேஸில் ரத்தம் சொட்ட சொட்ட பெண் சடலம் மீட்கப்பட்ட வழக்கில் திடீர் திருப்பமாக, 7 பவுன் நகைக்காக அவர் கொலை செய்யப்பட்டது தெரியவந்துள்ளது. இதுதொடர்பாக தந்தை, மகளிடம் போலீசார் தீவிர விசாரணை நடத்தி வருகின்றனர். இது பெரும் பரபரப்பை ஏற்படுத்தி உள்ளது. ஆந்திர மாநிலம் நெல்லூர் பகுதியை ேசர்ந்தவர் பாலசுப்பிரமணியம் (46), நகை செய்யும் ஆசாரி. இவரது மகள் தேவி (18), கல்லூரி மாணவி. இவர்கள் இருவரும் சூலூர்பேட்டையில் இருந்து சென்னை சென்ட்ரல் செல்லும் மின்சார ரயிலில் நேற்று முன்தினம் பிற்பகல் புறப்பட்டனர். கையில் 2 சூட்கேஸ்களையும் வைத்திருந்தனர். இரவு 7.45 மணியளவில் மீஞ்சூர் ரயில் நிலையத்தில் வந்து ரயில் நின்றது. உடனே இருவரும் சூட்கேஸ்களுடன் கீழே இறங்கினர். இரவு நேரம் என்பதால் சூட்கேஸை பிளாட்பார்மில் வைத்து விட்டு நைசாக நழுவி செல்ல முயன்றனர்.