எஸ்சி, எஸ்டி, ஓபிசி வளர்ச்சியை மோடி, ஆர்எஸ்எஸ் தடுக்கிறார்கள்

ராகுல்காந்தி குற்றச்சாட்டு

நமது நாட்டில் எஸ்சி, எஸ்டி, ஓபிசி பிரிவினரின் வளர்ச்சியை பிரதமர் மோடி, ஆர்எஸ்எஸ் அமைப்பினர் இணைந்து தடுக்கிறார்கள் என்று ராகுல்காந்தி குற்றம் சாட்டினார்.

அரசியல்சாசன 75வது ஆண்டுவிழாவை முன்னிட்டு டெல்லி தல்காத்ரோ மைதானத்தில் காங்கிரஸ் சார்பில் நடந்த விழாவில் மக்களவை எதிர்க்கட்சி தலைவர் ராகுல்காந்தி கலந்து கொண்டு பேசியதாவது: பிரதமர் மோடியும், ஆர்.எஸ்.எஸ் அமைப்பும் இணைந்து தலித், ஆதிவாசிகள் மற்றும் ஓபிசிகளின் வளர்ச்சிப் பாதையைத் தடுக்கும் வகையில் சுவரைப் பலப்படுத்தி வருகிறார்கள்.

பிரதமர் மோடி அரசியலமைப்பு சட்டத்தை படிக்கவில்லை என்பது எனது உத்தரவாதம். பிரதமர் மோடி இந்த புத்தகத்தை படித்திருந்தால், அவர் தினமும் என்ன செய்கிறாரோ, அதை அவர் செய்ய மாட்டார். நாட்டின் ஒட்டுமொத்த அமைப்பும் தலித்துகள், ஆதிவாசிகள் மற்றும் பிற்படுத்தப்பட்ட வகுப்பினருக்கு எதிராக உள்ளது. மெல்ல மெல்ல எஸ்சி, எஸ்டி, ஓபிசிகளின் வளச்சிப் பாதையைத் தடுக்கும் சுவர் வலுப்பெற்று வருகிறது.