பாரம்பரிய சின்னம், விவசாயிகளுக்கு பாதிப்பு ஏற்படுத்தும் டங்ஸ்டன் திட்டத்தை ரத்து செய்ய வேண்டும்

ஒன்றிய அரசை வலியுறுத்தி மக்களவையில் திமுக கூட்டணி எம்.பி.க்கள் போர்க்கொடி

‘பாரம்பரிய சின்னங்களுக்கும், விவசாயிகளுக்கும் பாதிப்பை ஏற்படுத்தும் டங்ஸ்டன் திட்டத்தை ரத்து செய்ய வேண்டும்’ என மக்களவையில் ஒன்றிய அரசை வலியுறுத்தி திமுக மற்றும் கூட்டணி கட்சி எம்பிக்கள் அழுத்தம் கொடுத்துள்ளனர்.

மதுரை மாவட்டம், மேலூர் வட்டம், நாயக்கர்பட்டி கிராமத்தில் டங்ஸ்டன் கனிம சுரங்கம் அமைப்பதற்கான உரிமத்தை இந்துஸ்தான் ஜிங்க் லிமிடெட் நிறுவனத்திற்கு ஒன்றிய அரசு வழங்கி உள்ளது. இந்த சுரங்கம், தமிழ்நாட்டின் முதல் பல்லுயிர் பெருக்க தலமான அறிவிக்கப்பட்ட அரிட்டாப்பட்டிக்கு அருகே அமைய இருக்கிறது. நாயக்கர்பட்டி மற்றும் சுற்றியுள்ள பகுதிகளில் பழங்கால கோயில்கள், வரலாற்று நினைவுச் சின்னங்கள், தொல்லியல் பொக்கிஷங்கள் உள்ளன. டங்ஸ்டன் சுரங்கம் அமைக்கப்பட்டால் இவை அனைத்தும் சேதமடைவதோடு, அப்பகுதியில் நீர் ஆதாரங்களும் அடியோடு பாதிக்கப்படும், அரியவகை உயிரினங்கள் அழியும் நிலை ஏற்படும் என சுற்றுவட்டாரத்தை சேர்ந்த 40 கிராம மக்கள் எதிர்ப்பு தெரிவித்து வருகின்றனர்.