மதச்சார்பற்ற பொது சிவில் சட்டம் கொண்டு வருவோம்

அரசியலமைப்பை உருவாக்கியவர்களும், உச்ச நீதிமன்றமும் பலமுறை வலியுறுத்தியபடி, மதச்சார்பற்ற பொது சிவில் சட்டத்தை கொண்டு வர பாடுபடுகிறோம்’’ என மக்களவையில் அரசியலமைப்பு சிறப்பு விவாதத்தில் பிரதமர் மோடி பதிலளித்து பேசினார்.

இந்தியாவில் அரசியலமைப்பு சட்டம் ஏற்றுக் கொள்ளப்பட்டு 75 ஆண்டுகள் நிறைவடைந்ததை கொண்டாடும் வகையில், அரசியலமைப்பு மீதான சிறப்பு விவாதம் மக்களவையில் 2 நாட்கள் நடந்தது. இதன் நிறைவு நாளான நேற்று பிரதமர் மோடி பதிலளித்து பேசியதாவது.  நாம் அனைவரும் கொண்டாட வேண்டிய தருணம் இது.

நாடு 100வது சுதந்திர தினத்தை கொண்டாடும் போது, இந்தியா வளர்ச்சி அடைந்த நாடாக இருக்கும். இந்த மைல்கல்லை எட்ட ஒற்றுமை முக்கியம். எனது அரசின் கொள்கைகளைப் பார்த்தால், நாட்டின் ஒற்றுமையை வலுப்படுத்த முயற்சித்துள்ளோம் என்பதை காண்பீர்கள். இந்த ஒற்றுமைக்கு 370வது பிரிவு தடையாக இருந்தது. அதனால்தான் அதை நீக்கினோம். ஜிஎஸ்டி மூலம் பொருளாதார ஒற்றுமையைக் கொண்டு வந்தோம். ஏழை மக்களுக்கு இலவச சிகிச்சை கிடைத்தால் அவர்கள் அதிகாரம் பெறுவார்கள். அதனால்தான் ஒரே நாடு, ஒரே சுகாதார அட்டை கொண்டு வந்தோம்.

அரசியலமைப்பு இன்று 75 ஆண்டுகளை நிறைவு செய்கிறது, ஆனால் முந்தைய மைல்கற்களைப் பார்த்தால். அரசியல் சாசனம் 25 ஆண்டுகள் நிறைவடையும் போது எமர்ஜென்சி அமல்படுத்தப்பட்டது. அரசியலமைப்பு உரிமைகள் மறுக்கப்பட்டு, நாடு ஒரு பெரிய சிறைச்சாலையாக மாற்றப்பட்டது. எமர்ஜென்சியின் பாவத்தை காங்கிரசின் தலையெழுத்தில் இருந்து ஒருபோதும் அழிக்க முடியாது.
காங்கிரசில் ஒரு குடும்பம் அரசியலமைப்பை புண்படுத்துவதில் எந்த வாய்ப்பையும் விட்டு வைக்கவில்லை. 75 ஆண்டுகளில், அந்த குடும்பம் 55 ஆண்டுகள் நாட்டை ஆட்சி செய்தது.

1947 முதல் 1952 வரை, நாட்டில் தேர்ந்தெடுக்கப்பட்ட அரசு இல்லை. இடைக்கால அரசு அமைந்திருந்தது. இதை பயன்படுத்தி 1951ல் அரசியலமைப்பை அவர்கள் மாற்றினர். இது அரசியலமைப்பை உருவாக்கியவர்களை அவமதிக்கும் செயல். அந்த நேரத்தில், ‘அரசியலமைப்புச் சட்டம் நமக்குத் தடையாக இருந்தால், அதில் மாற்றத்தைக் கொண்டு வர வேண்டும்’ என்று நேரு மாநில முதல்வர்களுக்கு கடிதம் எழுதினார். ஜனாதிபதியும் சபாநாயகரும் நேருவை எச்சரித்து தடுக்க முயன்றனர். ஆனாலும் அவர் தனது சொந்த அரசியலமைப்பை பின்பற்றினார். அரசியலமைப்பை சீர்குலைக்கும் இந்த பழக்கத்திற்கு காங்கிரஸ் அடிமையாகிவிட்டது.