சபரிமலையில் கட்டுக்கடங்காத பக்தர்கள் கூட்டம்

சபரிமலையில் இவ்வருட மண்டல கால பூஜைகளுக்காக நடை திறக்கப்பட்ட கடந்த நவம்பர் 15ம் தேதி முதல் பக்தர்கள் கடந்த வருடத்தை விட அதிகமாக குவிந்து வருகின்றனர்.

தினசரி ஆன்லைனில் 70 ஆயிரம் பேருக்கும், உடனடி முன்பதிவில் 10 ஆயிரம் பேருக்கும் மட்டுமே அனுமதி அளிக்கப்படும் என்று திருவிதாங்கூர் தேவசம் போர்டும், கேரள போலீசும் அறிவித்திருந்தது. ஆனால் பல நாட்களில் அதைவிட அதிகமாக பக்தர்கள் குவிந்தனர். ஆன்லைனில் இடம் கிடைக்காதவர்கள் சபரிமலைக்கு வந்து உடனடி முன்பதிவு மூலம் தரிசனம் செய்து வருகின்றனர்.

கடந்த மண்டல, மகரவிளக்கு காலத்தில் 70 ஆயிரம் பக்தர்கள் வந்தபோது கூட பக்தர்கள் 10 மணிநேரத்திற்கு மேல் வரிசையில் காத்திருக்க வேண்டிய நிலை ஏற்பட்டது. ஆனால் இம்முறை கேரள போலீஸ் மற்றும் தேவசம் போர்டின் கட்டுக்கோப்பான நடவடிக்கைகளால் பல நாட்களில் 85 ஆயிரத்திற்கும் மேல் பக்தர்கள் வந்தபோதிலும் அதிகபட்சமாக 6 மணிநேரத்திற்கு மேல் பக்தர்கள் காத்திருக்க வேண்டிய நிலை ஏற்படவில்லை.