அதிமுக ஆட்சியில் சிறை துறைக்கு உபகரணம் வாங்கியதில் ₹100 கோடி முறைகேடு 11 இடங்களில் விஜிலென்ஸ் ரெய்டு

உயரதிகாரிகள், ஒப்பந்ததாரர்கள் வீடுகளில் முக்கிய ஆவணங்கள் சிக்கின

அதிமுக ஆட்சியின்போது சிறைத்துறைக்கு உபகரணங்கள் வாங்கியதில் ரூ.100 கோடி வரை முறைகேடு நடந்தது தொடர்பாக பதிவு செய்யப்பட்ட வழக்கை தொடர்ந்து, மதுரை சிறைத்துறையில் பணியாற்றும் எஸ்பி ஊர்மிளா, கூடுதல் எஸ்பி வசந்தகண்ணன், நிர்வாக அதிகாரி தியாகராஜன் மற்றும் ஒப்பந்ததாரர் உள்பட 11 பேருக்கு சொந்தமான வீடுகள் மற்றும் மத்திய சிறை என சென்னை உள்பட 6 மாவட்டங்களில் லஞ்ச ஒழிப்பத்துறை அதிகாரிகள் நேற்று அதிரடி சோதனை நடத்தினர். இந்த சோதனையில் வழக்கு தொடர்பான முக்கிய ஆவணங்கள் மற்றும் வங்கி கணக்கு விவரங்களை கைப்பற்றி விசாரணை நடத்தி வருகின்றனர்.

அதிமுக ஆட்சியில் சிறைத்துறைக்கு எழுதுபொருட்கள் மற்றும் உபகரணங்கள் கொள்முதல் மற்றும் விற்பனை செய்ததில் 9 மத்திய சிறைகளில் சுமார் ரூ.100 கோடி அளவுக்கு முறைகேடு நடந்துள்ளதாக குற்றச்சாட்டு எழுந்தது. ஆடிட்டிங் கணக்குகளின்படி, குற்றச்சாட்டுக்கு ஆளான மதுரை சிறைத்துறை எஸ்பியான ஊர்மிளா கடந்த 10.2.2016 முதல் 10.2.2021ம் ஆண்டு காலத்தில் கடலூர் மத்திய சிறைத்துறை எஸ்பியாக பணியாற்றிய போது முறைகேடு நடந்தது. அதேபோல், தற்போது மதுரை மத்திய சிறையில் கூடுதல் எஸ்பியாக பணியாற்றி வரும் வசந்தகண்ணன், கடந்த 25.6.2019 முதல் 9.6.2021ம் ஆண்டு வரை பாளையங்கோட்டை சிறைத்துறை கூடுதல் எஸ்பியாக இருந்த காலத்தில் முறைகேட்டில் ஈடுபட்டுள்ளார்.

மேலும், தற்போது மதுரை மத்திய சிறை நிர்வாக அதிகாரியாக பணியாற்றி வரும் தியாகராஜன் கடந்த 31.7.2019 முதல் 31.3.2023 வரை வேலூர் மத்திய சிறையில் பணியாற்றிய காலத்தில் மோசடியில் ஈடுபட்டுள்ளனர்.
அதில், சிறைத்துறை எஸ்பியாக பணியாற்றிய ஊர்மிளா மற்றும் சிறை துறையில் கூடுதல் எஸ்பியாக பணியாற்றிய வசந்தகண்ணன், சிறைத்துறை நிர்வாக அதிகாரிதியாக ராஜன் ஆகியோர் 2016ம் ஆண்டு முதல் 2021ம் ஆண்டு காலக்கட்டத்தில் சிறை கைதிகள் உற்பத்தி செய்யும் எழுத்து பொருட்கள், நோட்டுகள் உள்ளிட்ட உபகரணங்களை நேரடியாக அரசு துறைகளான சிவகங்கை தேவக்கோட்டையில் உள்ள ஆர்டிஓ அலுவலகம், மதுரை மாவட்டம் பரவை டவுன் பஞ்சாயத்து, மதுரை மாவட்டம் உசிலம்பா்டி தாலுகா அலுவலகம், மதுரை உசிலம்பட்டி ஆர்டிஓ அலுவலகம், சிவகங்கை மாவட்டம் ஆதிதிராவிடர் நலவாரியம் அலுவலகம், மதுரை கே.கே.நகர் மாநில டாக்ஸ் அலுவலகத்திற்கு அனுப்ப வேண்டும்.