சிந்துவெளி எழுத்து முறையை கண்டறிந்தால் 8.5 கோடி ரூபாய் பரிசு

முதல்வர் மு.க.ஸ்டாலின் அறிவிப்பு தமிழை தவிர்த்துவிட்டு இந்திய வரலாற்றை எழுத முடியாது எனவும் பெருமிதம்

சிந்துவெளிப் புதிருக்கான உரிய விடையை கண்டுபிடித்து, சிந்துவெளி எழுத்து முறையை தெளிவாக புரிந்துகொள்ள உதவும் வழிவகையை தொல்லியல் அறிஞர்கள் ஏற்கும்படி வெளிக்கொணரும் நபர்கள் அல்லது அமைப்புக்கு ஒரு மில்லியன் அமெரிக்க டாலர் (ரூ.8.5 கோடி) பரிசாக வழங்கப்படும் என முதல்வர் மு.க.ஸ்டாலின் அறிவித்தார். மேலும், இந்திய துணைக்கண்ட வரலாற்றை தமிழை தவிர்த்துவிட்டு எழுத முடியாது என்றும் பெருமிதம் தெரிவித்தார்.

சென்னை எழும்பூர் அருங்காட்சியகத்தில் உள்ள கலையரங்கில் சிந்துவெளி பண்பாட்டு கண்டுபிடிப்பு நூற்றாண்டு நிறைவு பன்னாட்டு கருத்தரங்கத்தை முதல்வர் மு.க.ஸ்டாலின் நேற்று தொடங்கி வைத்தார். தொடர்ந்து, ரூ.50 லட்சத்தில் அமைக்கப்பட உள்ள சர் ஜான் மார்ஷல் சிலைக்கு அடிக்கல் நாட்டினார். மேலும், ‘சிந்துவெளி வரிவடிவங்களும்; தமிழ்நாட்டு குறியீடுகளும்’ எனும் ஆய்வு நூலை வெளியிட்டார். பின்னர், முதல்வர் மு.க.ஸ்டாலின் பேசியதாவது: 2021ம் ஆண்டு புதிய அரசு அமைந்தவுடன் அதற்கு திராவிட மாடல் அரசு என பெயர் சூட்டினோம்.

இது இரு கட்சியின் அரசு அல்ல; இனத்தின் அரசு என குறிப்பிட்டேன். அதற்கு அடையாளமாக இந்த விழா உள்ளது. இன வரலாற்றை ஆய்வு கண்ணோட்டத்துடன் பார்க்கும் முதிர்ச்சியுடன் அறிவு செயல்பாடாக இந்த கருத்தரங்கம் நடக்கிறது. சிந்துவெளி பண்பாடு நூற்றாண்டு நிறைவு விழாவை கொண்டாடியுள்ளோம். இந்திய துணை கண்ட வரலாற்றில் நமக்கான இடத்தை நிலைநிறுத்துவது தான் நமது நோக்கம்.  அந்தவகையில், வரலாறும் – பண்பாடும்- தொல்லியலும் தொலைநோக்கு பார்வையுடன் ஏற்பாடு செய்துள்ள நிதித்துறை அமைச்சர் தங்கம் தென்னரசு மற்றும் நிதித்துறை செயலர், தொல்லியல் ஆணையர் உதயச்சந்திரனுக்கு பாராட்டுகளை தெரிவித்துக்கொள்கிறேன்.