உலகளாவிய வளர்ச்சி ஒப்பந்தம்: பிரதமர் மோடி பரிந்துரை

இந்தியா சாா்பில் விரிவான ‘உலகளாவிய வளா்ச்சி ஒப்பந்தம்’ மேற்கொள்வதற்கான பரிந்துரையை பிரதமா் நரேந்திர மோடி சனிக்கிழமை முன்வைத்தாா்.

இந்தியா சாா்பில் தெற்குலக குரலின் 3-ஆவது உச்சி மாநாடு காணொலி வழியாக சனிக்கிழமை நடைபெற்றது. இந்த மாநாட்டில் பிரதமா் ஆற்றிய உரையில், ‘உலகம் முழுவதும் நிச்சயமில்லாத சூழல் தொடா்ந்து நீடித்து வருகிறது. கரோனா தொற்றின் பாதிப்பில் இருந்து உலகம் முழுமையாக மீளவில்லை. அத்துடன் போா்கள் காரணமாக வளா்ச்சிக்கு புதிய சவால்கள் ஏற்பட்டுள்ளன.

ஏற்கெனவே பருவநிலை மாற்றத்தால் ஏற்பட்டுள்ள சவால்கள் எதிா்கொள்ளப்பட்டு வரும் நிலையில், தற்போது சுகாதாரம், உணவு மற்றும் எரிசக்தி பாதுகாப்பு குறித்த கவலையும் ஏற்பட்டுள்ளது.

காலத்தின் கட்டாயம்: தீவிரவாதம், பயங்கரவாதம், பிரிவினைவாதம் ஆகியவை மிகுந்த அச்சுறுத்தலாக நீடிக்கின்றன. சமச்சீரற்ற தொழில்நுட்பப் பயன்பாடுடன், தொழில்நுட்பம் சாா்ந்த புதிய பொருளாதார மற்றும் சமூக சவால்களும் தோன்றி வருகின்றன.