அதிமுக ஆட்சியைவிட திமுக ஆட்சியில் அபரிமிதமான வளர்ச்சி

நிதியமைச்சர் தங்கம் தென்னரசு

சென்னை, மார்ச் 21: தமிழகத்தில் தொழில், ஊரக வளர்ச்சித் துறை உள்பட பல்வேறு துறைகளில் அதிமுகவின் 10 ஆண்டுகால ஆட்சியைவிட, திமுக ஆட்சியில் அபரிமிதமான வளர்ச்சி ஏற்பட்டுள்ளதாக நிதியமைச்சர் தங்கம் தென்னரசு தெரிவித்தார்.

சட்டப்பேரவையில் நிதிநிலை அறிக்கை மீது கடந்த நான்கு நாட்களாக நடைபெற்ற பொது விவாதங்களுக்கு பதிலளித்து தங்கம் தென்னரசு வெள்ளிக்கிழமை பேசியதாவது:

தொழில்வளர்ச்சியை அனைத்துப் பகுதிகளிலும் ஏற்படுத்தி பரவலான வளர்ச்சியை தமிழ்நாடு அரசு உறுதிப்படுத்துகிறது. அதன்படி, புத்தொழில் நிறுவனங்களுக்கும் ஊக்கம் அளிக்கப்பட்டு வருகிறது. அதிமுக ஆட்சிக்காலத்தில் தமிழ்நாட்டில் பதிவு செய்யப்பட்ட புத்தொழில் நிறுவனங்களின் எண்ணிக்கை 2,105 ஆக இருந்தது. கடந்த நான்கு ஆண்டுகளில் மட்டும் அதன் எண்ணிக்கை ஐந்து மடங்காக உயர்ந்து 10,649 ஆக அதிகரித்துள்ளது.

இதேபோன்று, சிறு, குறு தொழில்களின் எண்ணிக்கையும் 14.17 லட்சத்தில் இருந்து 32.10 லட்சமாக உயர்ந்துள்ளது. இது தொழில்களுக்கான உகந்த சூழ்நிலை தமிழ்நாட்டில் இருப்பதைக் காட்டுகிறது.

தொழிற்பூங்காக்கள்: தமிழகத்தில் கடந்த 10 ஆண்டுகால அதிமுக ஆட்சியில் 1,500 ஏக்கர் பரப்பில் 9 தொழிற்பூங்காக்கள் அமைக்கப்பட்டன. நான்கு ஆண்டுகால திமுக ஆட்சியில் 16,880 ஏக்கரில் 32 தொழிற்பூங்காக்கள் உருவாக்கப்பட்டுள்ளன.