தமிழகத்தில் 83 அரசு கலைக் கல்லூரிகளில் முதல்வர் பணியிடங்கள் காலி

தமிழகத்தில் உள்ள அரசு கலை மற்றும் அறிவியல் கல்லூரிகளில் 83 கல்லூரிகளில் காலியாக உள்ள முதல்வர் பணியிடங்கள் நிரப்பப்படாததால் நிகழாண்டு மாணவர் சேர்க்கை பணிகள் பாதிக்கப்படும் அபாயம் ஏற்பட்டுள்ளது.

- சி. சண்முகவேல்.

அரியலூர், மார்ச் 31:

தமிழகத்தில் 164 அரசு கலை மற்றும் அறிவியல் கல்லூரிகள் உள்ளன. இவற்றில் 83 கல்லூரிகளில் கடந்த பல மாதங்களாக முதல்வர் பணியிடம் நிரப்பப்படாமல், பொறுப்பு முதல்வர்களை கொண்டே செயல்படுகிறது. இதனால் கல்லூரிகளின் மேம்பாட்டு பணிகள் பெரிதும் பாதிக்கப்படுவதுடன், மாணவர்களின் கல்வித்திறனும் பாதிக்கப்படும் சூழல் உள்ளது.

கடந்த 2024-ஆம் ஆண்டின் தொடக்கத்தில், தமிழகம் முழுவதும் 13 கல்லூரிகளில் முதல்வர் பணியிடங்கள் மட்டுமே காலியாக இருந்தன. பிப்ரவரி மாதத்தில் இந்த எண்ணிக்கை 30-ஆக உயர்ந்தது. இப்போது காலியிடங்களின் எண்ணிக்கை 83-க்கும் அதிகமாகி விட்டன.