புதுவை அரசின் ஊழல் குறித்து ஜனாதிபதியிடம் புகார் அளிக்கப்படும் குற்றச்சாட்டுகளில் உண்மை இல்லை என்றால் வழக்கு தொடரலாம்

முன்னாள் முதலமைச்சர் நாராயணசாமி பரபரப்பு பேட்டி

புதுச்சேரி அரசின் ஊழல் முறைகேடுகள் குறித்து ஜனாதிபதியிடம் புகார் அளிக்கப்படும் என் றும் அரசு குறித்து எனது குற்றச் சாட்டுகள் உண்மை இல்லை என்றால், என் மீது வழக்கு தொடரலாம் என முன்னாள் முதலமைச்சர் நாராயணசாமி தெரிவித்துள்ளார்.

இது குறித்து நிருபர்களிடம் அவர் கூறியதாவது, சென்டாக் நிர்வாகத்தின் குளறுபடி, மருத்துவ மாணவர்களின் எதிர்காலத்தை கேள்விக்குறியாக்கியது. அரசு பள்ளி மாணவர்களுக்கு 10 சதவீத இட ஒதுக்கீட்டிற்கு செப்டம்பர் 4ம் தேதியே அனுமதி கிடைத்தது.

ஆனால், காலதாமதமாக கவுன்சிலிங் நடத்தப்பட்டது. இதற்கு முதலமைச்சர் ரங்கசாமி தான் பொறுப்பேற்க வேண்டும்.

சுப்ரீம் கோர்ட் அனைத்து மாநில மாணவர்களின் நலன்கருதி முடிவு எடுத்ததால் புதுச்சேரி மாணவர்களுக்கும் தற்போது நிவாரணம் கிடைத்துள்ளது. புதுச்சேரியில் மக்களுக்கு பாதுகாப்பு இல்லை. கஞ்சா நடமாட்டம் பெருமளவில் அதிகரித்து வருகிறது. அதிகாரிகளை மாற்ற முதலமைச்சருக்கு அதிகாரம் உண்டு. ஆனால், தலைமைச்செயலர் முதல்வருடன் பேசிய பிறகே அதிகாரிகளை மாற்றியதாக கூறுகிறார். கவர்னரோ அதிகாரிகளிடம் கருத்து வேறுபாடு உள்ளது என்கிறார்.