காரைக்கால் அம்மையார் மாங்கனித்திருவிழா மாப்பிள்ளை அழைப்புடன் துவங்கியது

இறைவனின் திருவாயால் 'அம்மையே' என்றழைக்கப்பட்ட பெருமைக்குரிய காரைக்கால் அம்மையார் மாங்கனித்திருவிழா இன்று மாலை மாப்பிள்ளை அழைப்புடன் துவங்கியது.

இறைவனின் திருவாயால் 'அம்மையே' என்றழைக் கப்பட்ட பெருமைக்குரிய காரைக்கால் அம்மையார் மாங்கனித்திருவிழா, இன்று (19.6.2024) மாலை மாப்பிள்ளை அழைப்புடன் துவங்கியது.

காரைக்கால் அம்மையார் வாழ்க்கை வரலாறு: புனிதவதியார் காரைக்காடு எனும் காரைக்காலில் மிகச்சிறந்த வணிகராய் வாழ்ந்து வந்தவர் தனதத்தர். இவரது செல்வ மகள் புனிதவதியார்.

புனித வதியார் சிறு வயதிலிருந்தே சிவபூசனை செய்து வந்தார். அறிவும், அழகும், பண்பும், மிக்கவராய் வளர்ந்து பருவமடைந்தார். நல்லதொரு நாளில் காரைக்காலை அடுத்த தமிழகப்பகுதியான நாகப்பட்டினம் நீதிபதியின் மைந்தன் பரமதத்தருக்கு புதிதவதியாரை மணம் முடித்து வைத்தார். மாமனாரின் விருப்பப்படி பரமதத்தர் காரைக்காலிலேயே தொழில் செய்து புனிதவதியாரோடு தனிக்குடித்தனம் நடத்தி வந்தார். வியாபாரம் வளர்ந்து, செல்வம் கொழித்தது.

ஒருநாள் இரு வணிகர்கள், இரு மாங்கனிகளைப் பரமதத்தரிடம் அளித்தனர். அவர், அவைகளை தனது வீட்டுக்கு அனுப்பி வைத்தார். அப்போது, நண்பகல் என்பதால், சிவனடியார் ஒருவர் அன்னம் வேண்டி புனிதவதியார் இல்லம் சென்றார்.

அடியாரின் பசித்த நிலையைக் கண்ட புனிதவதியார் அவரை வீட்டுக்குள் அழைத்து தயிர்சாதம் எனும் அமுது கணவர் அனுப்பிய படைத்து, மாங்கனிகளில் ஒன்றையும் இலையில் இட்டார். வயிறார உண்டு வாயார வாழ்த்தி விடைபெற்று அகன்றார் சிவனடியார்.

மாங்கனி:

அதன்பின் பரமதத்தர் வீடு திரும்பினார். புனிதவதியார் தம் கணவருக்கு அமுது படைத்து மீதியிருந்த ஒரு மாங்கனியையும் உண்ண வைத்தார்.

மாங்கனியை உண்ட பரமதத்தர் அது இனிமைமிக்கதாய் இருந்தமையால் மற்றொன்றையும் கேட்டார் பரமதத்தர்.

புனிதவதியார் என்ன செய்வதென்று புரியாமல், பூஜை அறையினுள் சென்று இறைவனை நினைத்து வேண்டினார்.

அப்பொழுது மற்றொரு மாங்கனி ஒன்று புனிதவதியார் கையில் வந்து தங்கியது.

அம்மையார் அதை உடனே பரமதத்தருக்கு வைத்தார். அந்த மாங்கனி முன்னதை விட சுவையில் மிக மேம்பட்டிருப்பதைக் கண்ட பரமதத்தர், இது தான் அனுப்பியது அன்று. இக்கனி ஏது? புனிதவதியாரிடம் வினவினார்.