தமிழகம் முழுவதும் வியாபாரிகள் கடையடைப்பு போராட்டம்

வணிக கட்டிடங்கள் வாடகை மீது 18 சதவீதம் ஜி.எஸ்.டி. வரி

மத்திய அரசின் ஜி.எஸ்.டி. கவுன்சில் நாடு முழுவதும் உள்ள வணிக நிறுவனங்களின் கட்டிடங்கள் வாடகை மீது 18 சதவீதம் ஜி.எஸ்.டி. வரி விதித்துள்ளது. இந்த வரி உயர்வு இன்று முதல் அமுலுக்கு வருகிறது. இதனால் பதிவு பெற்ற சிறிய வணிக நிறுவனங்கள், கடை உரிமையாளர்கள் பாதிக்கப்படுவார்கள்.

இதனால் வாடகை மீதான 18 சதவீத வரி விதிப்பை திரும்ப பெற வேண்டும் என்று வணிகர்கள் மத்திய அரசை வலியுறுத்தினர். ஆனால் இந்த வரி விதிப்பை மத்திய அரசு திரும்ப பெற வில்லை. மேலும் மாநில அரசு தொடர்ந்து உயர்த்தி வரும் சொத்துவரி, குப்பை வரி, பாதாள சாக்கடை வரி மற்றும் மின் கட்டண உயர்வால் கடும் அவதிப்படுவதாகவும், அதனை திரும்ப பெற வேண்டும் என்பதை வலியுறுத்தி இன்று தமிழகம் முழுவதும் உள்ள வணிக நிறுவனங்கள், கடைகளை அடைத்து போராட்டம் நடத்தப்போவதாக வியாபாரிகள் அறிவித்து இருந்தனர். அதன் படி சேலம் மாநகர் மற்றும் புறநகர் பகுதிகளில் கடைகளை அடைத்து வியாபாரிகள் போராட்டத்தில் ஈடுபட்டனர். குறிப்பாக சேலம் பழைய பஸ் நிலையம், புதிய பஸ் நிலைய பகுதிகளில் உள்ள ஜவுளி கடைகள், நகை கடைகள், செவ்வாய்ப்பேட்டையில் உள்ள பாத்திர கடைகள், இரும்பு கடைகள், பெயிண்ட் கடைகள், மளிகை கடைகள், மரக்கடைகள், அரிசி கடைகள் உள்பட பல்வேறு கடைகள் முற்றிலும் அடைக்கப்பட்டிருந்தன. சேலம் மாநகர் மற்றும் புறநகரில் உள்ள ஜவ்வரிசி ஆலைகள், அரிசி ஆலைகள், பருப்பு மில்கள் மூடப்பட்டிருந்தன. சேலம் லீ பஜாரில் உள்ள அனைத்து கடைகளும் அடைக்கப்பட்டிருந்தன.

இதனால் சேலம் கடை வீதி, லீ பஜார் மற்றும் செவ்வாய்ப்பேட்டை பகுதிகளில் மக்கள் நடமாட்டம் இன்றி வெறிச்சோடி காணப்பட்டது.