അശ്വിൻമേധം

ആറുവിക്കറ്റ് നേട്ടവുമായി ആർ. അശ്വിൻ ആദ്യ ടെസ്റ്റിൽ ഇന്ത്യക്ക് 280 റൺ വിജയം

ചെന്നൈ: വിരലുകളിൽ കെണിയൊരുക്കി വെറ്ററൻ ഓഫ് സ്പിന്നർ രവിചന്ദ്രൻ അശ്വിൻ മൈതാനം വാണ ചെപ്പോക്കിൽ ബംഗ്ലാദേശിനെ ചുരുട്ടിക്കെട്ടി ആതിഥേയർ. കിട്ടാക്കനിയായ കൂറ്റൻ വിജയലക്ഷ്യത്തിലേക്ക് മുടന്തി നീങ്ങിയ അയൽക്കാരെ 234 റണ്ണെടുക്കുമ്പോഴേക്ക് എല്ലാവരെയും മടക്കിയായിരുന്നു ഇന്ത്യയുടെ 280 റൺസ് വിജയോത്സവം.

നേരത്തെ സെഞ്ച്വറിയടിച്ച് ബാറ്റിങ്ങിൽ തിളങ്ങിയ അശ്വിൻ രണ്ടാം ഇന്നിങ്സിൽ ആറ് വിക്കറ്റുകളും സ്വന്തമാക്കി കളിയിലെ താരമായി. വിജയത്തോടെ ലോക ടെസ്റ്റ് ചാമ്പ്യൻഷിപ്പിൽ ഇന്ത്യ ഒന്നാം സ്ഥാനം തിരികെപ്പിടിക്കുകയും ചെയ്തു. പരമ്പരയിലെ രണ്ടാമത്തെയും അവസാനത്തെയും ടെസ്റ്റ് സെപ്റ്റംബ ർ 27ന് കാൺപുരിലെ ഗ്രീൻപാർക്കിൽ ആരംഭിക്കും.