ബ്ലാസ്റ്റ്

കേരള ബ്ലാസ്റ്റേഴ്സിനെ 3-1ന് വീഴ്ത്തി ബംഗളുരു എഫ്.സി

- നഹിമ പൂന്തോട്ടത്തിൽ

കൊച്ചി: തളികയിലെന്ന പോലെ കാലിലെത്തിയ എണ്ണമറ്റ അവസരങ്ങൾ കളഞ്ഞുകുളിക്കുകയും എതിരാളിക്ക് എളുപ്പം അടിച്ചുകയറാൻ ഗോളി തന്നെ ഗോൾമുഖം തുറന്നുകൊടുക്കുകയും ചെയ്തതിനൊടുവിൽ സ്വന്തം തട്ടകത്തിൽ തോൽവി ഇരന്നുവാങ്ങി കേരള ബ്ലാസ്റ്റേഴ്സ്. സീസണിൽ തോൽവിയറിയാതെ കുതിക്കുന്ന ബംഗളുരു എഫ്.സി ഒന്നിനെതിരെ മൂന്ന് ഗോളിനാണ് കേരള ബ്ലാസ്റ്റേഴ്സിനെ മുക്കിയത്.

ആർപ്പുവിളികളും ആരവങ്ങളുമായി കൊച്ചി നെഹ്റു സ്റ്റേഡിയത്തിലെ ഗാലറിയിൽ തിരമാലകൾ തീർത്ത മഞ്ഞക്കടൽ കളി തുടങ്ങി എട്ടാം മിനിറ്റിലേ കണ്ണീർച്ചാലായി. സെക്കൻഡുകൾ മിനിറ്റുകളിലേക്ക് വഴി മാറി ഇടവേളക്ക് പിരിയാൻ നേരം ആദ്യം വഴങ്ങിയ ഗോൾ തിരിച്ചടിച്ച ബ്ലാസ്റ്റേഴ്സിന്റെ ആരാധകർക്ക് ആശ്വാസത്തിന്റെ നെടുവീർപ്പ്. എന്നാൽ സമനിലയുടെ സമാധാനം 73-ാം മിനിറ്റു വരെയേ ഉണ്ടായിരുന്നുള്ളൂ. വീണ്ടും രണ്ടാം ഗോളിന്റെ നിരാശയിലേക്ക് ബ്ലാസ്റ്റേഴ്സ് മൂക്കും കുത്തി വീണു. ഒടുവിൽ 90-ാം മിനിറ്റിൽ വീണ്ടുമൊരു ഗോൾ മഞ്ഞപ്പടയുടെ വലയിലേക്കാഞ്ഞടിച്ച് ബംഗളുരു ബ്ലാസ്റ്റേഴ്സിനു മേൽ വിജയത്തിന്റെ അവസാന ആണിക്കല്ലും തറച്ചു. ബംഗളുരുവിനു വേണ്ടി രണ്ടാമത്തെയും മൂന്നാമത്തെയും ഗോൾ നേടി രണ്ടാം പകുതിയിലെ പകരക്കാരൻ എഡ്ഗാർ മെൻഡസ് വിജയശില്പിയായി.