பார்வையாளர்களுக்கு அடையாளஅட்டை!

மருத்துவமனை வாசல்களில் ‘மெட்டல் டிடெக்டர்' கருவி; அமைச்சர் மா.சுப்பிரமணியன் பேட்டி!!

கிண்டி அரசு மருத்துவமனையில் மருத்துவர் கத்தியால் குத்தப்பட்ட சம்பவத்தையடுத்து அரசு மருத்துவமனைகளில் பாதுகாப்பு நடவடிக்கைகள் அதிகரிக்கப்பட்டுள்ளன. நோயாளிகளுடன் வரும் பார்வையாளர்களுக்கு 4 வண்ணங்களில் அடையாள அட்டைகள் வழங்கப்படும் என அமைச்சர் மா.சுப்பிரமணியன் கூறினார். மேலும் மருத்துவமனை வாசல்களில் மெட்டல் டிடெக்டர் கருவி நிறுவப்படும் என்றும் கூறினார்.

சென்னை கிண்டியில் உள்ள கலைஞர் நூற்றாண்டு பன்னோக்கு சிறப்பு மருத்துவமனையில் புற்றுநோய் பிரிவுத் தலைவர், மருத்துவர் பாலாஜியை, நோயாளியின் மகன் கத்தியால் குத்திய சம்பவம் பெரும் பரபரப்பை ஏற்படுத்தியுள்ளது.

இதைக் கண்டித்து மாநிலம் முழுவதும் இன்று மருத்துவர்கள் போராட்டம் நடத்தினார்கள். அரசு மருத்துவமனைகளில் கூடுதல் பாதுகாப்பு போடப்பட்டுள்ளது. கிண்டி மருத்துவமனையில் துப்பாக்கி ஏந்திய போலீஸார் நிறுத்தப்பட்டுள்ளார்கள்.