திராவிட மாடல் ஆட்சி மீண்டும் அமைய உறுதி எடுங்கள்: எனது பிறந்த நாளுக்காக பேனர்கள் தேவையில்லை; பட்டாசு வெடிக்காதீர்!

தி.மு.க. தொண்டர்களுக்கு உதயநிதி ஸ்டாலின் வேண்டுகோள்!!

"எனது பிறந்த நாளை முன்னிட்டு பேனர்கள் வைக்க வேண்டாம். பட்டாசுகளை வெடிக்கக் கூடாது. மீண்டும் திராவிட மாடல் ஆட்சி அமைய உறுதி ஏற்றுக்கொள்ளவேண்டும்," என்று துணைமுதல்வர் உதயநிதி ஸ்டாலின் கேட்டுக்கொண்டுள்ளார்.

இது தொடர்பாக அவர் வெளியிட்டுள்ள அறிக்கையில் கூறியிருப்பதாவது:

வருகிற நவம்பர் 27 ஆம் தேதி என் பிறந்த நாள் வருவதை ஒட்டி, தமிழ்நாடு முழுவதும் கழகத்தினர் பல்வேறு நிகழ்ச்சிகளை நடத்தி வருகிறார்கள். அதிலும் குறிப்பாக, முத்தமிழறிஞர் கலைஞர் நூற்றாண்டு விழாவை முன்னிட்டு, கழகத்திற்கு நூறு இளம் பேச்சாளர்களைத் தேர்ந்தெடுத்து தாருங்கள் என்று கழகத் தலைவர் அவர்கள், கழக இளைஞர் அணிக்கு இட்ட கடமை நிறைவேற்றும் விதமாக நடத்தப்பட்ட 'என் உயிரினும் மேலான' பேச்சுப் போட்டி மூலம் தேர்ந்தெடுக்கப்பட்ட இளம் பேச்சாளர்கள் இந்த நிகழ்ச்சிகளில் பயன்படுத்தப்படுகிறார்கள் என்பதை அறியும் போது, உள்ளபடியே மகிழ்ச்சியடைகிறேன்.