வானிலை ஆய்வு மையம் எச்சரிக்கை; கடல் கொந்தளிப்பால் மீனவர்கள் பாதிப்பு!!

சென்னை, நவ.27-வங்கக் கடலில் உருவாகி உள்ள ஆழ்ந்த காற்றழுத்த தாழ்வு மண்டலம் இன்று மாலையிலோ அல்லது இரவிலோ புயலாக உருவெடுத்துவிடும் என வானிலை ஆய்வு மையம் எச்சரிக்கை விடுத்துள்ளது. இந்த புயலின் விளைவாக கடலோர மாவட்டங்களில் 3 நாட்கள் காற்றுடன் அதிக மழை பெய்யும். தற்போது கடல் கொந்தளிப்பாக உள்ளது. மீனவர்கள் கடலுக்குள் செல்லவில்லை.

தமிழ்நாட்டில் வடகிழக்கு பருவமழை கடந்த ஒரு மாதத்துக்கு மேலாக சரிவர பெய்யவில்லை. ஒரு சில மாவட்டங்களில் ஒரு சில இடங்களில் மட்டும் கூடுதலாக பெய்துள்ளது. மற்றபடி பெரும்பாலான மாவட்டங்களில் சராசரியைவிட மழை குறைவாகவே பெய்துள்ளது. மழையை மட்டுமே நம்பி உள்ள மானாவாரி குளங்களும் நிரம்பவில்லை. நிலத்தடி நீரும் அதிகரிக்கவில்லை. இதனால் கிணற்றுப் பாசன விவசாயிகளும் கவலையில் உள்ளார்கள்.

பருவக் காலத்தில் அடிக்கடி புயல் சின்னங்கள் தோன்றுவது வாடிக்கை. ஆனால் இந்த வருடம் அதிக எண்ணிக்கையில் உருவாகவில்லை. வடகிழக்கு பருவமழை தொடங்குவதற்கு 2 நாட்களுக்கு முன்னர் மட்டுமே குறைந்த காற்றழுத்த தாழ்வு நிலை உருவானது. அதன்பிறகு இன்னொரு புயல் உருவாகி ஒடிசாவை நோக்கி சென்றது. மற்றபடி புயல் சின்னங்கள் தோன்றவில்லை. இப்படிப்பட்ட நிலையில்தான் இப்போது வங்கக்கடலில் புயல் சின்னம் உருவாகி உள்ளது.