அரசியல் சாசன புத்தகத்தை ஏந்தியபடி பிரியங்கா இன்று எம்.பி.யாக பதவியேற்றார்!

கேரளாவின் பாரம்பரிய சேலை அணிந்து வந்தார்!!

வயநாடு தொகுதியில் இருந்து மக்களவைக்கு தேர்வு செய்யப்பட்ட காங்கிரஸ் பொதுச் செயலாளர் பிரியங்கா காந்தி (வயது 52) இன்று அரசியல் சாசன புத்தகத்தை கையில் ஏந்தியபடி எம்.பி.யாக பதவியேற்றுக் கொண்டார்.

சபாநாயகர் ஓம் பிர்லா அவருக்கு பதவிப் பிரமாணம் செய்து வைத்தார். கேரளாவின் பாரம்பரிய கசவு சேலை அணிந்து வந்து பிரியங்கா எம்.பி.யாக பதவி ஏற்றதை காங்கிரஸ் கட்சியினர் உற்சாகமாக கொண்டாடி வருகின்றனர். கடந்த நாடாளுமன்ற தேர்தலில் காங்கிரஸ் மூத்த தலைவர் ராகுல் காந்தி, ரேபரேலி மற்றும் வயநாடு ஆகிய இருதொகுதிகளிலும் வெற்றி போட்டியிட்டு பெற்றார்.

எனினும் ஒரு தொகுதியில் மட்டுமே எம்.பி.யாக தொடர முடியும் என்ற சூழலில், வயநாடு தொகுதியில் ராஜினாமா செய்து விட்டு தனது தாயார் சோனியாவின் சொந்த தொகுதியான ரேபரேலி எம்.பி.யாக பதவியில் தொடர்கிறார். இதையடுத்து வயநாடு தொகுதிக்கு இடைத்தேர்தல் நடைபெற்றது. கடந்த நவ 13 ஆம் தேதி வயநாடு தொகுதியில் இடைத்தேர்தல் நடைபெற்ற நிலையில், தேர்தலில் பதிவான வாக்குகள் நவ 23ஆம் தேதி எண்ணப்பட்டு முடிவுகள் அறிவிக்கப்பட்டன.