திரைப் பிரபலங்களின் கலை நிகழ்ச்சிகளுடன் ஐ.பி.எல். கிரிக்கெட் திருவிழா நாளை கோலாகல தொடக்கம்!

கொல்கத்தா பெங்களூர் அணிகள் முதல் போட்டியில் மோதுகின்றன!!

18வது ஐ.பி.எல். கிரிக்கெட் திருவிழா கொல்கத்தாவில் உள்ள ஈடன்கார்டன் மைதானத்தில் நாளை (சனிக்கிழமை) கோலாகமாக தொடங்குகிறது. பல்வேறு திரையுலக பிரபலங்கள் பங்கேற்கும் கண்கவர் நடன நிகழ்ச்சிகளுடன் தொடக்க விழாவுக்கான ஏற்பாடுகள் பிரமாண்டமான முறையில் செய்யப்பட்டுள்ளன. நாளை தொடங்கவுள்ள லீக் போட்டிகளில் முதல் ஆட்டத்தில் நடப்பு சாம்பியனான கொல்கத்தா நைட் ரைடர்ஸ் அணியை ராயல் சேலஞ்சர்ஸ் பெங்களூர் அணி எதிர்கொள்கிறது. ஐ.பி.எல். போட்டிகளைக் காண கோடிக்கணக்கான ரசிகர்கள் ஆர்வமுடன் காத்திருக்கின்றனர்.

கடந்த 2008ஆம் ஆண்டு முதல் நடைபெற்று வரும் இந்தியன் பிரீமியர் லீக் (ஐ.பி.எல்), உலகின் முதன்மையான 20 ஓவர்கிரிக்கெட் தொடராகும். அந்த வகையில் 18வது ஐ.பி.எல். கிரிக்கெட் திருவிழா நாளை (மார்ச் 22) தொடங்குகிறது. வழக்கம் போல் இம்முறையும் 10 அணிகள் களம் காணுகின்றன.

ஒவ்வொரு அணி நிர்வாகமும் தேவையில்லாத வீரர்களை விடுவித்தும், அணிவியூகத்துக்கு ஏற்ப புதிய வீரர்களை ஏலத்தில் எடுத்திருப்பதால், என அணி வீரர்கள், கேப்டன்கள், பயிற்சியாளர்கள் கணிசமான அளவில்மாற்றங்கள் நடந்துள்ளன. முன்னதாக இந்த சீசனுக்கான வீரர்களின் மெகா ஏலம் சவுதி அரேபியாவில் கடந்த ஆண்டு நவம்பர் மாதம் 24 மற்றும் 25 தேதிகளில் நடைபெற்றது. இந்த ஏலத்தில் 577 வீரர்கள் பங்கேற்றனர். இறுதியாக 62 வெளிநாட்டு வீரர்கள் உள்பட 182 வீரர்கள் ரூ.639.15 கோடிக்கு ஏலத்தில் எடுக்கப்பட்டனர்.

ஐ.பி.எல். கிரிக்கெட்டில் இந்த சீசனில் 5 அணிகள் புதிய 5 கேப்டன்களுடன் களம் காணுகிறது. டெல்லி அணியின் கேப்டனாக இருந்த ரிஷப் பண்ட்'ஐ லக்னோ அணி அதிகபட்சமாக ரூ.27 கோடிக்கு ஏலத்தில் எடுத்து அவரை அந்த அணியின் கேப்டனாக நியமித்தது. இதனால் டெல்லி அணியின் கேப்டனாக கடந்த சாம்பியன்ஸ் கோப்பை தொடரில் சிறப்பாக செயல்பட்ட அக்சர் படேல் நியமிக்கப்பட்டுள்ளார். இதே போல கொல்கத்தா அணியின் கேப்டனாக இருந்து கடந்த முறை கோப்பையை வென்று கொடுத்த ஸ்ரேயாஸ் அய்யரை, பஞ்சாப் அணி ஏலத்தில் எடுத்து அவரை அந்த அணியின் கேப்டனாக நியமித்துள்ளது.