શાબાશ : રથયાત્રાના બીજા જ દિવસે રસ્તા ચકાચક સાફ કરી નાખ્યા

કાલુપુર સ્વામિનારાયણ મંદિર, ઈસ્કોન મંદિર, શાહીબાગ સ્વામિનારાયણ મંદિર સહિતનાં ૮૪ ધર્મસ્થાનો પર સૂકા-ભીંના કચરાનાં સ્ટિકર લગાવી જનજાગૃતિ કરાઈ

અમદાવાદ, ગુરુવાર

ગયા મંગળવારની અષાઢી બીજે અમદાવાદની અસ્મિતાના પ્રતીકરૂપ ૧૪૬મી ઐતિહાસિક રથયાત્રા નીકળી હતી. આ રથયાત્રા પહેલાં અને પસાર થયા બાદ મ્યુનિ. તંત્રના સોલિડ વેસ્ટ મેનેજમેન્ટ વિભાગ દ્વારા બંને વખત યુદ્ધના ધોરણે સફાઈની કામગીરી હાથ ધરાઈ હતી. આ કામગીરી હેઠળ રથયાત્રા રૂટ પરથી ૨૮૫ મેટ્રિક ટન જેટલો ઘનકચરો એકત્ર કરાયો હતો.

રથયાત્રાના મધ્ય ઝોનના આઠ રૂટ અને ઉત્તર ઝોનના સાત રૂટ અને ૧૪ જેટલાં રસોડાં પર સફાઈ તથા સેનિટેશનની કામગીરી દિવસ-રાત ત્રણ શિફ્ટમાં કરવામાં આવી હતી, જે માટે ૩૦૦ જેટલા સફાઈ કામદારો, ૨૫ જેટલા સેનેટરી સુપરવાઇઝરી સ્ટાફ અને ૫૯ બંધ-બોડીનાં વાહનો-ટ્રકો, છ જેસીબી અને બોબકેટ પ્રકારનાં વાહનો તથા મશીનરી મૂકી સફાઈની કામગીરી કરાઈ હતી.

સોલિડ વેસ્ટ મેનેજમેન્ટ વિભાગનો હવાલો સંભાળતા ડેપ્યુટી મ્યુનિ. કમિશનર, ડિરેક્ટર અને તેમની ઝોનલ કક્ષાની ટીમ દ્વારા સતત મોનિટરિંગ કરી સફાઈની કામગીરી હાથ ધરાઈ હતી.