દેશના કેટલાય વિસ્તારોમાં માવઠું ત્રાટકશેઃ ઠંડી કંપાવશે

જમ્મુ-કાશ્મીર, હિમાચલ, ઉત્તરાખંડમાં ભારે હિમવર્ષા, નવા વર્ષે ઠંડીનો રેકોર્ડ તૂટવાની સંભાવના

દેશનાં હવામાનમાં અચાનક પલટો આવ્યો છે. ક્યાંક ભારે વરસાદ તો ક્યાંક હિમવર્ષા, ગાઢ ધુમ્મસ અને કાતિલ ઠંડીમાં લોકો અટવાઈ રહ્યા છે. પહાડી અને મેદાની વિસ્તારોમાં લોકો કાતિલ ઠંડીમાં ઠૂંઠવાઈ રહ્યા છે, તો દક્ષિણનાં રાજ્યોમાં ઠંડી સાથે ભીંજાઈ રહ્યા છે. પંજાબના ચંડીગઢના કેટલાક વિસ્તારોમાં હળવો વરસાદ પડવાની સંભાવના છે. હવામાન વિભાગ અનુસાર, આજે તામિલનાડુમાં અલગ અલગ સ્થળોએ ગાજવીજ સાથે હળવોથી મધ્યમ વરસાદ અને કરાઈકલમાં આજે અને આવતી કાલે ભારે વરસાદની સંભાવના છે. પર્વતો પર હિમવર્ષા ચાલુ છે. અનેક વિસ્તારોમાં તાપમાનનો પારો માઈનસથી નીચે પહોંચી ગયો છે. પહાડો પર શિયાળાની પકડ મજબૂત બની જતાં મેદાની વિસ્તારોમાં હાડ થીજવતી ઠંડીનું જોર એકાએક વધી ગયું છે. દિલ્હીથી પટના, જયપુરથી લખનૌ સુધી શિયાળો કઠિન સ્તરે યથાવત્ છે.