પાંચ દિવસ અતિ ભારે: શહેરમાં વહેલી સવારથી અનરાધાર વરસાદ

મેઘરાજાએ પારડી-વલસાડને ધમરોળીને ૨૪ કલાકમાં સાત ઈંચ વરસાદ વરસાવ્યો

અમદાવાદ, ગુરુવાર

ગુજરાતમાં અષાઢી મેઘે બરાબરની જમાવટ કરી છે. આમ તો રાજ્યમાં વરસાદનું આગમન વિલંબમાં મુકાયું છે, તેમ છતાં એકસાથે બે-બે સિસ્ટમ સક્રિય થવાથી મેઘરાજાએ કેટલાક વિસ્તારમાં તોફાની બેટિંગ કરવા લીધી છે. આવા તોફાની માહોલ વચ્ચે હવામાન વિભાગ દ્વારા રાજ્યમાં આગામી પાંચ દિવસ અનેક વિસ્તારોમાં ભારેથી અતિ ભારે વરસાદ વરસી શકે તેવી આગાહી કરી છે. દરમિયાન, આજે સવારના દસ વાગ્યા પછી અમદાવાદમાં મેઘરાજા મહેરબાન થતાં કોતરપુરમાં અઢી ઈંચ, નિકોલમાં દોઢ ઈંચ અને મેમ્કોમાં એક ઈંચ, વિરાટનગર, ઓઢવ, રાણીપમાં અડધો ઈંચ વરસાદ પડ્યો હતો. સમગ્ર અમદાવાદમાં વરસાદ વરસતાં વાતાવરણમાં ભારે ઠંડક પ્રસરી ગઈ હતી.