જૂનાગઢ પાણી-પાણી: ભેસાણમાં સવારના બે કલાકમાં સાડા પાંચ ઈંચ વરસાદ ખાબક્યો

વીંસાવદરમાં ૨૪ કલાકમાં ૧૬ ઈંચ વરસાદ ઝીંકાયોઃ ચોમાસાએ ૧૧નો ભોગ લીધોઃ હજુ સૌરાષ્ટ્ર-દક્ષિણ ગુજરાતમાં મેઘો ગાજશે

અમદાવાદ, શનિવાર

સૌરાષ્ટ્રમાં સતત બીજા દિવસે અનરાધાર વરસાદ વરસ્યો છે. મેઘરાજાએ ખાસ કરીને જૂનાગઢ જિલ્લાને પાણી-પાણી કરી નાખ્યો છે. આ જિલ્લાના ગીરનારમાં બે દિવસમાં ૨૦ ઈંચ જેટલો વરસાદ ખાબકતાં અનેક નદીનાળાં છલકાયાં હતાં. દરમિયાન, આજે સવારે મેહુલિયાએ જૂનાગઢ જિલ્લાના ભેસાણમાં તોફાની અંદાજમાં વરસાદ વરસતા માત્ર બે કલાકમાં સાડા પાંચ ઈંચ વરસાદ નોંધાતા ભેસાણવાસીઓ મુશ્કેલીમાં મુકાઈ ગયા હતા.

જૂનાગઢ જિલ્લામાં મેઘરાજાએ અપાર સ્નેહ દાખવ્યો હોઈ આ જિલ્લાના વીસાવદર તાલુકામાં આજે સવારે છ છ વાગ્યે પૂરા થયેલા છેલ્લા ૨૪ કલાકમાં કુલ ૧૬ ઈંચ વરસાદ ખાબક્યો હતો. જંગલ વિસ્તારમાં તો તેનાથી પણ વધુ વરસાદ પડ્યો હતો. જામનગરમાં ૧૧ ઈંચ વરસાદ પડતાં સર્વત્ર જળબંબાકાર જેવી સ્થિતિ થઈ છે. જામનગરમાં તોફાની વરસાદથી મંદિર તળાવની દીવાલ ધસી પડવાથી ૨૨ લોકોનું સ્થળાંતર કરાયું હતું, જ્યારે જુદી જુદી દુર્ઘટનામાં છ લોકો ડૂબ્યા હતા, જેમાં ચાર લોકોનાં મોત થયાં હતાં.