બરસો રે મેઘાઃ અમદાવાદમાં ચોમાસાની સિઝનમાં ૬૪ ટકા વરસાદ વરસી ગયો

ગયા ચોમાસામાં પડેલા ૩૯ ઈંચ વરસાદ સામે આ વખતે ૨૫ ઈંચ વરસાદઃ શહેરમાં ઝાપટાંનો માહોલ જળવાશે

અમદાવાદ, સોમવાર

શહેરમાં આ વખતે ચોમાસું અનેક પ્રકારની વિચિત્રતા લઈને આવ્યું છે. હવે ઓછા સમય માટે પણ ભારે તીવ્રતાથી વરસાદ પડી રહ્યો છે, જેના કારણે જે વિસ્તારમાં આવો મેહુલિયો ત્રાટકે છે ત્યાં થોડા સમયમાં જ સર્વત્ર જળબંબાકાર થઈ જાય છે, જ્યારે બીજી તરફ અન્ય વિસ્તારમાં સામાન્ય વરસાદ નોંધાય છે. વરસાદ ભારે કે અતિભારેની શ્રેણીના બદલે તીવ્રતાથી પડતો હોઈ મ્યુનિસિપલ કોર્પોરેશનના સત્તાવાળાઓમાં પણ એવા સમયે લાચાર બની જાય છે અને પશ્ચિમ અમદાવાદ ગણો કે પૂર્વ અમદાવાદ, પણ શહેરના અનેક વિસ્તારમાં જળ ત્રાસદીનો અનુભવ લોકો અનુભવ કરતા હોઈ નોકરીએથી ઘરે પહોંચતા લોકોને પરસેવો વળી જાય છે. તેમાં પણ મોડી સાંજે મેઘરાજા ત્રાટકતા હોઈ જનજીવન અસ્તવ્યસ્ત થઈ જાય છે. જોકે ગયા વર્ષના ચોમાસાની સરખામણીમાં આ વખતે હજુ વરસાદ ઓછો પડ્યો છે. હજુ ૬૪ જ ટકા વરસાદ શહેરમાં વરસ્યો છે.