પવિત્ર શ્રાવણનો પહેલો સોમવારઃ શિવાલયોમાં શ્રદ્ધાળુઓનું ઘોડાપૂર

રુદ્રાભિષેક અને વિવિધ પૂજા કરાવવા માટે પણ વેઈટિંગ

અમદાવાદ, સોમવાર

શ્રાવણ મહિનાના પહેલા સોમવારના દિવસે ભક્તો શિવાલયોમાં દર્શનાર્થે ઊમટ્યા છે. ભક્તોની ભારે ભીડને પહોંચી વળવા માટે મુખ્ય શિવાલયોમાં સિક્યોરિટી તેમજ રેલિંગની પણ વ્યવસ્થા કરવી પડી છે, જ્યારે ગર્ભગૃહમાં પૂજા કરવા માટે સવારના ૧૧ વાગ્યા સુધીનો સમય નિશ્ચિત કરાયો છે. મંદિરમાં શ્રાવણના ચાર સોમવારે મહાદેવજીને ફૂલ, શાકભાજી શણગાર સહિતના કરવામાં આવશે. મંદિરના પ્રાંગણમાં ખાસ બ્રાહ્મણો દ્વારા રુદ્રાભિષેક સહિત વિવિધ પૂજા કરાવવા માટે પણ લાંબું વેઈટિંગ ચાલી રહ્યું છે. બ્રાહ્મણો દ્વારા યજમાન યથાશક્તિ ૧૦૮થી ૧૦૦૧ સુધીની પાર્થેશ્વર પૂજા કરાવી રહ્યા છે. શહેરનાં મંદિરો બહાર બીલીપત્ર, કમળ તેમજ ફૂલ વેચવા માટે પણ દુકાનો ઊભી થઈ ગઈ છે. કેટલાંક શિવાલયોમાં શ્રાવણના ચાર સોમવાર દરમિયાન શિવજી માટે વિવિધ પ્રકારનાં ફૂલ, ઘીનાં કમળ, બરફમાંથી શિવલિંગ બનાવવાનું આયોજન કરવામાં આવ્યું છે.