ગુજરાતે તોફાની વરસાદ માટે રાહ જોવી પડશેઃ ચોથા રાઉન્ડમાં મેઘસવારી મોડી

અમદાવાદ સહિત રાજ્યમાં ૨૭ ઓગસ્ટ સુધી માત્ર સામાન્ય વરસાદી ઝાપટાં જ પડશે

અમદાવાદ, મંગળવાર

ઓગસ્ટ મહિનામાં ૧૫૯ એમએમ વરસાદ થવો જોઈતો હતો, પરંતુ રાજ્યમાં આ મહિનામાં વરસાદ ઘણો ઓછો થયો હોવાથી માત્ર ૧૭ એમએમ વરસાદ વરસ્યો છે. રાજ્યમાં ચોથા રાઉન્ડના તોફાની વરસાદ માટે થઈને લોકોએ હજુ રાહ જોવી પડશે. કેમ કે તોફાની વરસાદ લાવે તેવી સિસ્ટમ સર્જાઈ નથી.

સ્થાનિક હવામાન વિભાગની આગાહીમાં જણાવાયા મુજબ, ગુજરાતમાં આવતી ૨૭ ઓગસ્ટ સુધી ભારે વરસાદની સંભાવના નથી. જોકે, આજે રાજ્યના અનેક વિસ્તારોમાં હળવોથી મધ્યમ પ્રકારનો વરસાદ પડી શકે છે, પરંતુ કાલથી વરસાદનું જોર ફરી પાછું ઘટશે.