નવરાત્રીને નહીં લાગે ગુનાખોરીનું ગ્રહણ: શક્તિની રક્ષા કાજે પોલીસ રહેશે ખડેપગે

રાતે કોઈ વ્યક્તિ સતત તમારો પીછો કરતી હોય તો તરત જ પોલીસ અને પરિવારજનોને જાણ કરો.

વિશ્વના સૌથી લાંબા નૃત્યોત્સવ ગણાતા નવરાત્રી પર્વની રાત્રિએ નાનાં બાળકોથી લઈ વયોવૃદ્ધ લોકોમાં ભારે ઉત્સાહ જોવા મળે છે. નવરાત્રી પર્વની રઢિયાળી રાતે ગરબે ઘૂમવાનો આનંદ કંઈક અનેરો હોય છે. નવરાત્રીની રાત્રિઓમાં ગુનાઈત માનસિકતા ધરાવતાં તત્ત્વો પણ સક્રિય બનતાં હોય છે, જેનાથી બચવા માટે થોડી સતર્કતા રાખવી જરૂરી છે. ઘરથી દૂર-દૂરના અંતરે પાર્ટી પ્લોટ અને ફાર્મ પર યોજાતી ગરબા પાર્ટી ક્યારેક ભયાનક પણ સાબિત થાય છે. નવરાત્રી પર્વ પહેલાં, નવરાત્રી પર્વ દરમિયાન કે નવરાત્રી પર્વ બાદ આપણે સૌએ સાવધાની અને સતર્કતા રાખવી હિતાવહ છે અને દરેક વ્યક્તિએ સતર્કતા, સુરક્ષા અને સલામતી જાળવવી જોઈએ. પોલીસ તો લોકોની સુરક્ષા કરવા માટે ખડેપગે તહેનાત છે, પરંતુ ઘણી વખત આપણે પોતે જ આપણી સુરક્ષા કરવી પડે છે.

આજથી નવલી નવરાત્રીનો પ્રારંભ થઈ રહ્યો છે ત્યારે ખેલૈયાઓ મન મૂકીને ગરબા ઝૂમવા માટે આતુર છે. નવરાત્રીમાં વરસાદ ગ્રહણ બની શકે, પરંતુ અહીંયાં વાત છે ગુનાખોરીના ગ્રહણની. રાજ્યમાં નવરાત્રીની ઉજવણી સલામતી અને ચિંતામુક્ત રીતે રાખવા રાજ્ય પોલીસે માઇક્રો લેવલનું પ્લાનિંગ કરી દીધું છે. અમદાવાદ સહિત તમામ શહે૨ના પોલીસ કમિશનર, રેન્જ આઈજીને રાજ્ય પોલીસવડા દ્વારા વિશેષ સૂચનાઓ આપી દેવાઇ છે. ગરબાના સ્થળે ટ્રાફિક જામથી માંડીને ગુનાખોરી રોકવા સાથે મુક્ત વાતાવરણમાં નવરાત્રીની ઉજવણી થાય તે માટે પાર્ટી પ્લોટ, ગરબાના ગ્રાઉન્ડ પર પોલીસ તહેનાત કરી દેવામાં આવી છે. ગરબે ઝૂમતી વખતે ખેલૈયાઓ સાથે પોલીસની ‘શી ટીમ’ પણ ટ્રેડિશનલ ડ્રેસ પહેરીને ગરબે ઘૂમી રહી છે. રોમિયોગીરી કરતા ગઠિયાઓને ઝડપી લેવા માટે ‘શી ટીમ’ને સ્પેશિયલ ટ્રેનિંગ પણ આપવામાં આવી છે.