ઉત્તર ઝોનની ૨૯, પશ્ચિમ ઝોનની ૧૦ મિલકતોની જાહેર હરાજી કરાશે

પ્રોપર્ટી ટેક્સની વસૂલાત માટે AMC એક્શનમાં ઉત્તર ઝોતમાં રૂ. ૧,૪૫,૪૭,૨૨૨ અને પશ્ચિમ ઝોતમાં રૂ. ૮૯,૩૨,૫૨૩તો ટેક્સ બાકી: ડિફોલ્ટર્સને સાતથી ૧૫ દિવસનો સમય આપવામાં આવ્યો

અમદાવાદ મ્યુનિસિપલ કોર્પોરેશન (એએમસી)એ એક તરફ આગામી નાણાકીય વર્ષ ૨૦૨૫-૨૬ના બજેટની તડામાર તૈયારીઓ આરંભી દીધી છે અને નાગરિકો પાસેથી બજેટ માટેનાં સૂચનો મંગાવ્યાં છે તો બીજી તરફ પ્રોપર્ટી ટેક્સની વસૂલાત માટે સત્તાધીશો આકરા પાણીએ આવ્યા છે અને ટેક્સ ડિફોલ્ટર્સ સામે એક્શન લેવાની તૈયારી કરી લીધી છે. અમદાવાદ મ્યુનિસિપલ કોર્પોરેશનના ઉત્તર ઝોનના પ્રોપર્ટી ટેક્સ વિભાગે આજે ૨૯ મિલકતોના ટેક્સ ડિફોલ્ટર્સને નોટિસ ફટકારી છે અને સાત દિવસની અંદર બાકી ટેક્સ ભરપાઈ કરવા માટે સ્પષ્ટ શબ્દોમાં ચેતવણી આપી છે. જો આમ કરવામાં નહીં આવે તો સાત દિવસ બાદ ઉત્તર ઝોનની આ તમામ ૨૯ મિલકતોની જાહેર હરાજી કરવાની પ્રક્રિયા હાથ ધરાશે તેવી ચીમકી પણ ઉત્તર ઝોનના ડેપ્યુટી મ્યુનિ. કમિશનરે ઉચ્ચારી છે. આ ઉપરાંત પશ્ચિમ ઝોનના ટેક્સ વિભાગે પણ સમયસ૨ પ્રોપર્ટી ટેક્સની ચુકવણી નહીં કરનારા ૧૦ ડિફોલ્ટર્સને નોટિસ ફટકારી છે અને આગામી ૧૫ દિવસમાં તેઓ ટેક્સની ચુકવણી નહીં કરે તો તેમની મિલકતોની જાહેર હરાજી કરાશે તેવું નોટિસમાં જણાવાયું છે.