ચીનમાં ૭.૧ની તીવ્રતાના ભૂકંપથી ૫૩ લોકોનાં મોતઃ ભારત, નેપાળ અને ભુતાનમાં પણ આંચકા અનુભવાયા

વહેલી સવારે દિલ્હી NCRમાં પણ ભૂકંપના આંચકા અનુભવાયા

ચીનના તાબા હેઠળના તિબેટ પ્રાંતમાં આજે વહેલી સવારે આવેલા ૭.૧ની તીવ્રતાના વિનાશક ભૂકંપના કારણે અત્યાર સુધીમાં ૫૩ લોકોનાં મોત થયાંના અહેવાલ મળ્યા છે, જ્યારે ૬૦થી વધુ લોકો ગંભીર રીતે ઈજાગ્રસ્ત થયા હોવાથી મૃત્યુઆંક વધે તેવી દહેશત છે. ચીનની સરકારી ન્યૂઝ એજન્સી શિન્હુઆના જણાવ્યા અનુસાર સ્થાનિક સમય પ્રમાણે આજે સવારે ૯.૦૫ વાગ્યે (ભારતીય સમય મુજબ ૬.૩૦ કલાકે) આવેલા આ ભૂકંપનું કેન્દ્ર તિબેટના શિજાંગમાં જમીનથી દસ કિલોમીટર નીચે હતું.

આ વિનાશક ભૂકંપના આંચકા છેક ભારત સુધી અનુભવાયા હતા. બિહાર, આસામ અને પશ્ચિમ બંગાળ ઉપરાંત દેશના અનેક વિસ્તારોમાં વહેલી સવારે ભૂકંપના આંચકા અનુભવાતા લોકો ડરી ગયા હતા. નેપાળના લોબુચેથી ૮૪ કિમી ઉત્તર, ઉત્તર-પશ્ચિમમાં ૭.૧ની – તીવ્રતાનો ભૂકંપ આવ્યો હતો, જેનું કેન્દ્ર જમીનથી ૧૦ કિમી નીચે હતું.