இனப்பிரச்சினைக்கு தீர்வு காண்பதில் சம்பந்தனின் கனவு மெய்ப்படும்

அக்கிராசன உரையில் ஜனாதிபதி ரணில் தெரிவிப்பு. அரசியல் கைதிகள் படிப்படியாக விடுதலை. பிளவுபடாத நாட்டுக்குள் அதிகாரப் பகிர்வு. காணாமல் ஆக்கப்பட்டோரை கண்டறிய நடவடிக்கை

- பா.நிரோஸ்

‘தேசிய இனப்பிரச்சினைக்குத் தீர்வு காணும் விடயத்தில் இரா.சம்பந்தனுக்கும் எனக்கும் பொதுவான கனவு ஒன்று உள்ளது. அந்தக் கனவை இம்முறை வெற்றிபெறச் செய்வேன்” என்று தெரிவித்த ஜனாதிபதி ரணில் விக்கிரமசிங்க, அரசில் உயர்ந்தபட்ச அதிகாரப் பகிர்வை வழங்க எதிர்பார்ப்பதாகவும் தெரிவித்தார்.

ஒன்பதாவது பாராளுமன்றத்தின் நான்காவது கூட்டத்தொடரை புதன்கிழமை (09) மீள ஆரம்பித்து வைத்து அக்கிராசன உரையாற்றும்போதே ஜனாதிபதி மேற்கண்டவாறு தெரிவித்தார்.

தொடர்ந்து உரையாற்றிய அவர், “கடந்த காலங்களில் மக்கள் பாரிய துன்பங்களுக்கு முகங்கொடுக்க வேண்டிய நிலை ஏற்பட்டது. குறிப்பாக, மண்ணெண்ணெய், பெற்றோல், டீசல் வரிசைகளில் நாள்கணக்கில் அலைக்கழிய நேரிட்டது.

களைப்புற்ற மக்கள் தமது உயிர்களை வரிசைகளில் நின்ற நிலையில் இழந்தார்கள்.  

அழுத்தத்தை பொறுத்துக்கொள்ள இயலாமல் மக்கள் வீதிக்கு இறங்கினார்கள்.

ஆனாலும், இன்று நிலைமை மாற்றமடைந்துள்ளது. பொருளாதாரம் தற்போது ஓரளவு ஸ்திரத்தன்மையை அடைந்துள்ளது. மக்கள் ஓரளவு ஆறுதல் அடைந்துள்ளார்கள்.

அபாயகரமான தொங்கு பாலத்தில் இலங்கை தாயை வெகுதூரம் பாதுகாப்பாக கொண்டு செல்வதற்கு எம்மால் முடிந்துள்ளது. நாம் அவ்வாறு பயணித்த பாதை இலகுவானது அல்ல. ஆனாலும் பயணம் இன்னமும் முடிவடையவில்லை” என்றார்.

ஐ.எம்.எப்பை தவிர வேறு வழியில்லை

தற்பொழுது நாம் கடன் மறுசீரமைப்புக்காக எமக்கு கடன் வழங்கிய தரப்பினர்களுடன் கலந்துரையாடி வருகின்றோம். அதற்கு மேலதிகமாக ஒத்துழைப்பைப் பெற்றுக்கொள்ள முடியுமான ஒரேயொரு நிறுவனம் சர்வதேச நாணய நிதியம் மாத்திரம் ஆகும். வேறு மாற்று வழிகள் இல்லை; இருந்தால் கூறுங்கள்.

இறுதிக் கட்டத்தில் கலந்துரையாடல்

தற்பொழுது நாம் சர்வதேச நாணய நிதியத்துடன் கலந்துரையாடல்களின் இறுதிக் கட்டத்துக்கு வந்துள்ளோம். கடந்த செப்டெம்பர் மாதமளவில் அடிப்படை இணக்கப்பாட்டுக்கு வருவதற்கு எம்மால் முடிந்தது. கடன் பேண்தகு தன்மையை ஏற்படுத்தும் வேலைத்திட்டம் மாத்திரமே தற்போது எஞ்சியுள்ளது.

பாதை சரி என்பதாலேயே சர்வதேசம் ஒத்துழைக்கிறது