வீடு புகுந்து பெட்ரோல் குண்டுவீசி வாள்வெட்டு களேபரமானது பிறந்தநாள் பெண் பலி 10 பேர் காயம்

பிறந்தநாள் கொண்டாட்டம் நடைபெற்றுக்கொண்டிருந்த போது, இனந்தெரியாத குழுவொன்று வீடு புகுந்து, பெட்ரோல் குண்டை வீசி, தீ மூட்டி கொளுத்திவிட்டு, நடத்திய வாள்வெட்டு மற்றும் குண்டாந்தடி தாக்குதலில், பெண்ணொருவர் உயிரிழந்ததுடன், காயமடைந்த பத்து பேர் வைத்தியசாலையில் அனுமதிக்கப்பட்டுள்ளனர்.

- க.அகரன்

இந்த சம்பவம், வவுனியா, தோணிக்கல் பகுதியில், ஞாயிற்றுக்கிழமை (23) அதிகாலை வேளையில் இடம்பெற்றுள்ளது.

சம்பவத்தில் 21 வயதான பாத்திமா சம்மா சப்தீர் என்ற பெண் உயிரழந்துள்ளார். காயமடைந்து வைத்தியசாலையில் அனுமதிக்கப்பட்டுள்ள 10 பேரில், சிறுவர்களும் உள்ளடங்குகின்றனர்.

உயிரிழந்த பெண்ணின் கணவனைத் தேடிச் சென்ற குழுவே தாக்குதல் நடத்தியுள்ளது.

சம்பவம் தொடர்பில் பொலிஸாரின் 119 அவசர இலக்கத்துக்கு கிடைத்த தகவலின் அடிப்படையில் ஸ்தலத்துக்கு விரைந்த வவுனியா பொலிஸாரும், வவுனியா நகரசபை தீயணைப்பு பிரிவினரும் மற்றும் பிரதேசவாசிகளும் இணைந்து தீயை அணைத்துள்ளனர்.

இளைய மகளின் பிறந்தநாள் கொண்டாட்டத்தின் போது, நள்ளிரவு 12 மணியளவில் முகத்தை மூடிக்கட்டிக் கொண்டு திடீரென உள்நுழைந்த கும்பல், அங்கிருந்தவர்களை சரமாரியாக வெட்டியதுடன், அனைவர் மீதும் பெட்ரோல் ஊற்றியுள்ளனர்.