“பதில் பொலிஸ் மா அதிபரை ஏன்? நியமிக்கவில்லை"

தேசபந்து தென்னக்கோன், பொலிஸ்மா அதிபராக செயற்படுவதற்கு இடைக்கால தடையுத்தரவு விதித்து உயர்நீதிமன்றம் தீர்ப்பளித்துள்ள நிலையில், அந்தப் பதவிக்கு பதில் பொலிஸ்மா அதிபரை நியமிக்க நடவடிக்கை எடுக்காதிருப்பது தொடர்பில் எதிர்க்கட்சிகள் கேள்வியெழுப்பியதால் சபையில் வியாழக்கிழமை (25) சர்ச்சை ஏற்பட்டது.

இதன்போது சபை முதல்வரான அமைச்சர் சுசில் பிரேமஜயந்த மற்றும் ஆளும்கட்சி பிரதம கொரடா பிரசன்ன ரணதுங்க ஆகியோர் எதிர்க்கட்சியினருடன் வாக்குவாதத்திலும் ஈடுபட்டனர்.

பாராளுமன்றம் வியாழக்கிழமை (25) முற்பகல் 9.30 மணியளவில் பிரதி சபாநாயகர் ஆஜித் ராஜபக்ஷ தலைமையில் கூடியதை தொடர்ந்து எதிர்க்கட்சித் தலைவர் சஜித் பிரேமதாச பொலிஸ்மா அதிபர் விவகாரம் தொடர்பில் தனது கருத்துக்களை முன்வைத்து உரையாற்றினார்.