“தமிழர்களின் பண்பாடும் வேரூன்றி நிலைத்து நிற்கும்”

கிராமத்து மக்கள்தான் இந்தக் கலைகளை அழியாமல் தொடர்ந்து பேணிக் கொண்டிருக்கிறார்கள்

கலைகள் இருக்கின்ற வரையில் தமிழர்களின் பண்பாடும் வேரூன்றி நிலைத்து நிற்கும். கலைகள் இல்லாமல் போனால் எமது பண்பாடும் கலாசாரமும் காலாவதியாகிவிடும். எனவே, கிராமத்தில் கலைகள் என்பன அந்த அந்த கிராமத்துக் கலைஞர்களால் உயிரூட்டப்பட்டுத் தொடர்ந்து பேணப்பட்டு வருகின்றன.

இது கிராமத்து மக்களின் கடமை என்று சொல்வதைவிடத் தமிழ் மக்களுக்காக அவர்கள் ஆற்றுகின்ற உயர்ந்த பணியாகக் கருத முடியும் என இலங்கைத் தமிழரசுக் கட்சியின் மட்டக்களப்பு மாவட்ட பாராளுமன்ற உறுப்பினர் ஞானமுத்து சிறிநேசன் தெரிவித்துள்ளார்.

மட்டக்களப்பு மாவட்டம் பழுகாமம் கிராமத்தில் சனிக்கிழமை (04.05.2024) பாஞ்சாலி கலைக் கழகத்தினரால் இரண்டு தசாப்தங்களின் பின்னர் கிராமிய கலையாகிய 'வள்ளி தினைப்புனம்' எனும் கரகம் மீள் உருவாக்கம் செய்யப்பட்டு சதங்கை அணியும் விழா இடம்பெற்றது. இதன்போது கலந்து கொண்டு கருத்து தெரிவிக்கையிலேயே அவர் இவ்வாறு தெரிவித்தார்.