సింగిల్ పేజీ కథ

ఈ రోజు నాన్నగారి శత జయంతి. పొద్దుటే గుడికెళ్లి పూజ చేయించి ఇంటికొచ్చాక కాఫీ తాగుతూ సెల్ ఫోన్లో వాట్సప్ సందేశాలు చూస్తూ కూర్చున్నాను.

- తాళ్ళూరి లక్ష్మి

ఈ రోజు నాన్నగారి శత జయంతి. పొద్దుటే గుడికెళ్లి పూజ చేయించి ఇంటికొచ్చాక కాఫీ తాగుతూ సెల్ ఫోన్లో వాట్సప్ సందేశాలు చూస్తూ కూర్చున్నాను.

నాన్నగారి గొప్పతనం గురించి, నాన్నగారితో వారికున్న అనుబంధం గురించి ఎందరో పరిచయస్తులు, మరెందరో అపరిచితులు పంపిన సందేశాలు చూస్తుంటే మస్తిష్కం స్తంభించిపోయింది.

ఒక మనిషి మనల్ని వీడిపోయి దశాబ్దాల కాలమైనా ఇంకా ఇప్పటికీ ఇంత మంది గుర్తు పెట్టుకున్నారంటే ఆ మనిషి జీవన సాఫల్యానికి ఇంతకంటే కావాల్సిన నిదర్శనమేముంది అనిపించింది.

అలాగని నాన్నగారు ఏవేవో మహత్కార్యాలు చేయలేదు. ఆయన చేసిందల్లా నా వారు, పరాయివారు అనుకోకుండా మనుషులందరినీ ఒకేలా ప్రేమించడం. తనకున్న దాంట్లోనే ఇతరులకు సహాయం చేయడం.ఉన్నదాంతోనే సంతృప్తిగా జీవిస్తూ ఎప్పుడూ సంతోషంగా ఉండగలగడం.

ఆయన అంత ఆదర్శవంతంగా జీవితం గడపగలిగారంటే అది కేవలం ఆయన ఒక్కరి గొప్పతనమే కాదు.ఆయన ఆదర్శాలకు జీవితాంతం సహాయ సహకారాలు అందిస్తూ, ఎల్లప్పుడూ చేదోడు వాదోడుగా ఉన్న మా అమ్మగారిది కూడా.